مساء الفل يا هوانم …
هنعمل شوية فتة عجب النهاردة.
هنبتدي بالشوربة الأول:
من أحلى قطعيات اللحوم المناسبة للسلق بتبقى الرقبة الضاني
عشان كدة هنستخدم رقبة مقطعة … بس النهاردة مش هنحط اللحمة في مياه سخنة … هنحط اللحمة في مية الحنفية عادي ونحط فيها بصلة كاملة كبيرة … جزرة … سيقان كرفس مقشرة وهنحط حبهان ومستكة وقرنفل وورق لاورا
ونخلي المياه تبتدي تسخن … أول ما المياه تغلي هنوطي النار ونحط الحلة على أوطى عين بوتجاز.
ليه بنعمل كدة !!! الرقبة عبارة عن عضلات … العضلات دي مليانة كولاجين ودي مادة بروتينية شديدة … لما بنحطها في مياه مغلية بتشد وتغير تركيبة اللحوم … وعشان تستوي بتاخد وقت أطول طبعا … لكن لما اللحوم بتستوي في درجات حرارة هادية خالص يادوبك بتطلع فقاقيع صغيرة يبتدي الكولاجين ده يسيح وهو متدلع تماما ويبتدي يتحول لجيلاتين طري وبيدوب حتة اللحمة ويعزز نكهتها كمان، كل الخضار والتوابل دي بتضيف نكهة رائعة للشوربة.
طيب لما اللحمة غليت حصل إيه !!؟؟ ظهر ريم على وش المرقة … دي مش قلة نظافة في اللحمة … اللحمة أصلا ما بتتغسلش عشان غسيل اللحوم بيخليها بيئة خصبة للبكتريا
الريم ده عبارة عن تخثر بروتيني، ده بيظهر من أي حاجة فيها بروتين سواء خضار أو لحوم .. المهم هنشيل الريم ده عشان ممكن يعكر لون اللحمة ويغير طعمها
في الوقت ده هنكون بنقطع رغيفين عيش بلدي مكعبات ونرش عليه بودرة بصل ونحط عليه معلقتين كبار سمنة الهانم ونحمصه في الفرن أو نحمره على الطاسة زي ما تحبوا يا هوانم.
تعالو برضو واللحمة بتتسلق نعمل الرز … والرز بيحب السمنة … هنعمل رز أبيض
هنحط معلقتين كبار سمنة الهانم في حلة على النار ونحط كوبايتين رز، نقلبه تقليبتين وبعد كدة ننزل بكوبايتين ونص مياه … كوباية الرز الواحدة عليها كوباية وربع مياه ده المقدار المظبوط للرز إللي يخليه يطلع مفلفل وحلو.
بعد كدة أول ما الرز يتشرب نوطي النار خالص ونحط غطاء محكوم الغلق
وبالمرة تعالوا نعمل الصلصة كمان … هنبشر بصلة ناعم وندق فصين توم وفي طاسة نحط معلقة كبيرة سمنة الهانم ونشوح فيها البصلة والثوم و ما نخليهومش ياخدوا لون … يدووب يدبلو بس.
وبعد كدة ننزل ب ٣ طماطم متصفيين كويس ونسيبها تتسبك كويس وبعد كدة ننزل بمعلقتين صلصة ونسيبها عالنار لحد ما تطلع زيت على الوش وتتقل ويبقي لونها غامق وبعد كده نحط عليها ربع كوباية خل ونقلب تقليبة كويسة ونقفل النار ونبشر عليها نص حبة جوزة الطيب ونسيبها تهدى خالص.
الطشة بقى عبارة عن ٣ معالق كبار سمنة الهانم وعليها رشة ملح ومعلقتين كبار فلفل أسود مطحون طازه ونحطهم عالنار لحد ما الطاسة تفور شوية … خلي بالكم الطشة لازم تفضل سخنة على طول.
خلاص اللحمة استوت والمرقة بقت غنية وجميلة … تعالو نركب الطبق على بعضه،
في طبق غويط هنحط العيش المتحمص ونحط يا دوب مغرفة مرقة ومغرفة رز ومغرفة صلصة ومعلقة من الطشة ونقلب كويس ونغطيه ونسيبه ٣ دقايق مثلا.
إحنا مش عايزين العيش يبقى طري خالص وبايش .. إحنا عايزينه فيه سنة قرمشة نشيل الغطا ونحط مغرفتين كبار شوربة ونحط معلقة طشة وملعقة صلصة كبيرة وبعد كدة نحط كل الرز إللي فاضل ونغطي الوش بالصلصلة و طشة السمنة والفلفل الأسود
وبكدة يبقى طعم الصلصة والطشة موجود لآخر معلقة في طبق الفتة.
وبالهنا والشفا يا هوانم
كتب بواسطة مدون وناقد الطّعام الذواقة محمد صلاح
#الهانم #قصة_تانية_خالص #بهاريز_صلاح
النهاردة الأكلة بتاعتنا بيحبها الصغير قبل الكبير وعلى الرغم من بساطتها بس فيها شوية حركات بسيطة يا تخليها تبقى وهمية و لذيذة جدا زي المطاعم
(ودي طبعا ليها سر وإحنا هنعمله النهاردة)
يا إما تبقي ناشفة وملهاش طعم.
النهاردة يوم الشيش طاووق الشيش طووق لازم حتما ولابد يجي من الوراك !!! ليه لازم من الورك عشان الورك ماليان دهون أكتر من الصدر وأنسجته أخف من الصدر برضه فبالتالي الدهون بتديله طعم أحلى وتسوية أسرع.
فاهنجيب الوراك ونقطعها مكعبات متوسطة الحجم.
إحنا هنعمل تتبيلتين تتبيلة لمدة ساعة وتتبيلة نخلي الفراخ فيها مش أقل من ست ساعت ولحد بالكتير ١٢ ساعة.
١- التتبيلة الأولى نبشر بصلة كبيرة كويس وناخد الميه بتاعتها بس … أنا مش عايز التفل بتاع البصل … تفل البصل لما بيتحط على النار بيشيط ويتحرق الأول والفراخ ما بتكونش إستوت … مية البصل تتصفى الأول كويس وأحط عليها نص كوباية ليمون وفلفل أسود … فقط لاغير و أحط فيها الوراك لمدة ساعة بس كفاية … ليه ساعة؟ عشان البصل وعصير الليمون تقريبا عملوا نوع من أنواع التسوية للفراخ لأن الليمون حامض أو بمعنى أصح أسيد … فهو كدة عمل تسوية جزئية للفراخ.
٢- نطلع ونحط في التتبيلة التانية .. إللي هي عبارة عن: علبتين زبادي ..أربع فصوص توم مهروسين ..
٣ معالق كبار مسطردة ناعمة أو وسط .. معلقة بابريكا حمرا .. فلفل أسود ناعم. وتبات في التلاجة لحد تاني يوم ونطلعها قبل التسوية بساعة عشان تاخد درجة حرارة الغرفة ونحط عليها الملح بتاعنا بعد نص ساعة و نسويها على طول … مش ملاحظين إن إحنا محطناش ملح غير قبل التسوية بنص ساعة بس !!!! عارفين ليه !!؟؟
عشان أغلب الناس بتحط الملح في التتبيلة وتخليها تبات في التلاجة أو تتبل وتتحط في الفريزر فاإللي بيحصل إن الملح يسحب كل السوايل إللي جوه قطعة الفراخ أو الشيش .. و لما تيجي تسوي تاني يوم تلاقي الفراخ ناشفة واتحرقت بسرعة عشان مفيهاش السائل إللي بيديها الطعم أصلا. طيب خلاص تبلنا وظبطنا كل حاجة… هنعمل إيه بعد كدة؟ ممكن نحط خضار نشويه مع الشيش زي البصل القورمة .. فلفل ألوان … مشروم .. زي ما تحبو. نيجي لنقطة الشوي أو التسوية بقي: لو هنشوي على الفحم والسيخ حديد يبقي خير وبركة السيخ كله على بعضه هيستوي بالظبط في ٤ دقايق عشان سخونية السيخ هتسوي قلب الفراخ من جوة كمان
(خدو بالكم الفراخ مش زي اللحمة ممكن تتاكل نص تسوية .. الكلام ده في اللحوم الحمرا بس … اللحوم البيضاء لأ تجيب تسمم علي طول)
لو هنسوي في سيخ خشب على الفحم يبقي لازم يتنقع في الميه بالكامل قبلها بنص ساعة عشان مش أول ما يتحط على النار يتحرق .. وهياخد في حدود ٥ دقايق. و لو هتسوي في سيخ خشب على الطاسة طبعا كل ناحية من الشيش بتاخد دقيقتين تسوية يعني في حدود ٧ دقايق تقريبا للسيخ.
لو هتسوي في الفرن يبقي ممكن يتحط في الأسياخ الخشب المنقوعة في الميه دي لمدة نص ساعة على درجة حرارة ١٨٠ و لو مفيش أسياخ عادي برضه. لو هنسوي على الطاسة من غير سيخ يبقى لازم تكون الطاسة سخنة جدا وفيها شوية زيت خفيف سخن برضه وأحط الشيش فيها وأول ما ياخد لون أقلب الناحية التانية وهكذا لحد ما يستوي.
ليه وقت التسوية معانا قليل كدة … عشان إحنا قولنا دي وراك بتستوي أسرع … وعشان حطيتها في حمض إللي هو الليمون و البصل وده سواها تسوية جزئية فا مش محتاج أدوس عليها في التسوية أووي إلا لو قلبها لسة مستواش.
و اول ما هتطلع من النار هتكون اتشوت وفي نفس الوقت طرية وجميلة ومفيهاش ريحة الحرق … يادوب لون الكراميل الجميل ده … و تقدموها جنب مكرونة أو رز ومعها شوية طحينة بالثوم والبقدونس
و بالهنا والشفا يا هوانم
#الهانم #قصة_تانية_خالص #بهاريز_صلاح
حشوة البيتزا الشرقي داخل عجينة الرقاق الطري
كلنا زهقنا من الأكلات التقليدية في حياتنا ونفسنا نعمل حاجة جديدة تعجب الصغير قبل الكبير واعتقد ما فيش حاجة أحلى من البيتزا وبالذات لوعملناها جوه الرقاق الطري الشرقي الجميل.
المقادير لعمل عجينة الرقاق الطري:
كيلو دقيق
معلقة كبيرة عسل نحل
نص كوب زيت هلا عباد شمس
رشة ملح
ماء حسب الحاجة
بداية التحضير:
للرقاق: هنحط الدقيق والملح ونقلب، نضيف العسل والماء والزيت ونعجن لغاية ماتتشكل العجينة ونغطيها تريح نص ساعة وبعد كدة نطلعها ونقسمها على ٨ أو ٦ كور ونبتدي نفرد العجينة بالماردنة أو النشابة.
نبتدي نسوي الرقاق على طاسة مقلوبة على النار !!! أيوة هنفرد الرقاقة على ظهر الطاسة مغسولة كويس وأول ما نحس إنه خد لون نقلب الناحية التانية ومع أول لون ليها نشليها ونغطيها بفوطة عشان ما تنشفش
مقادير الحشوة:
سمنة الهانم
جبنة موتزريلا
جبنة شيدر أحمر
شرايح زيتون
شرايح فلفل أخضر
مشروم متقطع رفيع
نبتدي نرص الصينية .. ندهن أرضية الصينية بسمنة الهانم ونحط أول طبقة من الرقاق الطري وندهن وشه سمنة الهانم … و نحط الطبقة التانية برضو و ندهن بالسمنة برضو لحد أربع طبقات ونبتدي نرص الحشوة بتاعتنا الجبنة الموزريلا الأول وبعد كدة المشروم والجبنة الشيدر والزيتون والفلفل الرومي ونبتدي نرص نفس طبقات الرقاق الطري واحدة واحدة مع دهن كل وش بالسمنة.
وآخر طبقة ندهنها ونقطع الصينية قبل ما تدخل الفرن.
ندخلها الفرن على درجة حرارة ١٨٠ لمدة ٢٠ دقيقة
ممكن كمان حسب الرغبة ندهن وش صينية الرقاق الطري ب نص كوباية لبن أو كريمة لباني عليها صفار بيضتين ومعلقة قهوة سريعة الذوبان ورشة فلفل أسود
الوصفة دي ينفع نحشيها سجق شرقي أو بسطرمة
بواقي الفراخ بتاعت إمبارح بس بعد ما نكون فصصناها وسخناها جوة نص كوباية كريمة لباني ومعاها ٣ معالق سبانخ و فصين توم
بواقي أي حتة لحمة فاضلة جوه التلاجة بعد ما تكون اتقطعت واتسخنت في شوية صويا صوص ومعها شوية بسلة وجزر مسلوقين وبصلة مبشورة ،ممكن جبنة رومي مبشورة و عليها لحمة مفرومة عصاج.
#الهانم #قصة_تانية_خالص #بهاريز_صلاح
مساء الفل يا هوانم
مين فينا مش بياكل سمبوسك … اعتقد مفيش … النهاردة هقدمهالكم بمجموعة حشوات كتيرة جدا ومتميزة كمان.
المقادير:
– ٤ كوب دقيق.
– علبة زبادي.
– ٣/٤ كوب زيت.
– ملعقة صغيرة ملح أو حسب الرغبة.
– كوب ماء دافىء (يتحط بالتدريج ممكن نحتاجه كله او لأ حسب الدقيق).
الحشوات:
١- حشوة اللحمه:
– ٢ بصلة كبيرة مفرومة ناعم.
– ٥٠٠ جم لحم مفروم.
– ملعقة صغيرة بهارات لحم.
– بيضة مسلوقة متقطعة رفيع.
– بسلة وجزر حسب الرغبة.
– ملعقة صغيرة ملح.
– ١/٢ كوب أو كوب كامل بقدونس مفروم.
٢- حشوة الجبنة:
– جبن حلوم.
– جبن موتزاريلا.
– حبة بركة.
– بقدونس.
٣- حشوة السبانخ:
– ٢٥٠ جرام سبانخ طازة أو معلبة.
– ربع كوب زيت زيتون.
– ١ بصلة كبيرة مفرومة ناعم.
– ربع كوب ليمون.
– معلقة كبيرة صنوبر.
– بشرة جوزة الطيب.
– ملح وفلفل أسود.
نشتغل بقي:
– في طبق نضيف الدقيق مع ملح ونقلب ثم نضع الزيت ونبس الدقيق مع الزيت باليد حتى يصبح كحبات الرمل.
– نضع الزبادي ونستمر بالفرك، ثم نضيف ماء دافىء بالتدريج مع المزج حتى تتكون عجينة مرنة وطرية نستمر في العجن ٥ دقائق إلى عشر دقائق (العجن حتى يتكون عجين مرن جدا وده إللي بيحدد مقدار الماء المضاف).
– ندهن أيدينا بالزيت ونجمع العجين ثم نغلفها بالزيت وتتلف بالبلاستيك وتترك ترتاح ساعة، نرش الرخامة بالدقيق ونقسم العجينة إلى أربع أجزاء ثم نفرد كل جزء.
– بقطاعة دائرية نقطع العجين ثم نضيف الحشوة في وسط العجينة.
– تدهن الأطراف بقليل من الماء لتسهل التصاق العجين عند غلقها.
– نشكل الدائرة على شكل نصف دائرة ونتأكد من غلق الطرف وإحكام السمبوسك (ممكن نشتري أداة بلاستيك لعمل السمبوسك سعرها رخيص وبتتباع في كل حتة).
– برفق ننقل قطعة السمبوسك بأيدينا ثم نمط الأطراف المغلقة ونبدأ بلفها على شكل ضفيرة للتاكد من إغلاقها نهائي.
– في اللحظة دي يمكن تخزين السمبوسك في الفريزر عن طريق وضعها في صينية مرشوشة دقيق طبقة واحدة وتغليفها ثم وضعها في الفريزر حتى التجمد وبعدها نخرجه وهي متجمدة وتترص في عبوة ويوضع بين الطبقات بلاستيك أو ورق زبدة حتى لا تلتصق ببعضها.
الحشو:
حشوة اللحمه:
في طاسة على النار يوضع الزيت وبعد كدة البصل لحد ما يدبل ونحط اللحمة وملح وفلفل أسود ونقلب لغاية اللحمة ما تستوي بعد رفعها من النار نضيف البقدونس و نقلب ونصفي الحشوة على مصفة لتخليصها من الزيوت ونتركها تبرد تماماً.
حشو الجبن:
تمزج كل الجبن مع بعضها ونضع البقدونس وحبة البركه ونصفي الحشو بشاشة لأن الجبنة قد يكون فيها سائل
وممكن نستخدم جبنة مربعات او مثلثات.
حشو السبانخ:
نطبخ السبانخ لمدة ١٠ دقايق من غير غطاء على نار هادية وبعد كدة نصفيها.
في طاسة نحط الزيت والبصل ونسيبه يدبل نضيف السبانخ وندي تقليبة لكله، نحط الملح والفلفل الأسود وجوزة الطيب والصنوبر أو المكسرات وعصير الليمون ونسويه لمدة ٥ دقايق وبعد كدة نسيبه يهدى خالص تجهيزا للحشو.
ملاحظة:
لازم يكون الحشو المستخدم جاف تماما وبارد عند الحشو حتى لا يتقطع العجين عند التشكيل.
حشو الجبن ضروري يكون عند تشكيل العجين، عند القلي نضع قطع السمبوسك على صنية مدهونة دقيق لأن الحشو ممكن يجعل العجينة طرية بالتالي يلتصق بالصينية وبذلك سيتقطع عند رفعه.
نقلي العجينة في زيت غزير (عشان العجينة ما تشربش زيت كثير ممكن نحطها قبل وضعها في الزيت مباشرة إما في ماء متدوب فيه نشا او ماء متدوب فيها دقيق نحط ونرفع على طول) أو ترص في صينية وتدهن بسمنة الهانم وتوضع في الفرن على درجة حرارة ١٨٠.
بالهنا والشفا يا هوانم
كتب بواسطة مدون وناقد الطّعام الذواقة محمد صلاح
#الهانم #قصة_تانية_خالص #بهاريز_صلاح
الفول وما اداراك ما طبق الفول … الطبق إللي كل المصريين أجمعوا عليه … الطبق إللي مالوش مواعيد فطار عشاء… صبح وبعد الظهر.
الطبق إللي كل الناس أجمعت عليه ويعتبر مسمار المعدة نظرا لاحتوائه على نسب عالية من البروتين إللي تكاد تقارن باللحوم لكن اللحوم فيها أحماض أمينية أساسية لنمو الجسم فيفضل دايما لما نعمل الفول يبقي في حاجة جنبه زي سلطة أو بيض أو جبنة أو زبادي أو بطاطس أو ليمون عشان الليمون بيساعد على امتصاص الحديد إللي جوه الفول ده غير إنه مليان فيتامين (ج).
و نظرا إن قشرة الفول صعبة الهضم وبتاخد وقت طويل كتير في الهضم عشان كدة بتدي إحساس طويل بالشبع عشان كدة اسمه مسمار المعدة.
بس تعالو ندمس الفول في البيت الأول
الأول يفضل نقع الفول الناشف لمدة من ١٢ ل ٢٤ ساعة لأن كدة بيساعد على تقليل وقت الطهي وبيرجع القشرة طرية و كمان بيساعد على إزالة جزء كبير من سموم البقوليات إللي بتبقى موجودة في القشرة القاسية بتاعتها.
ندمس بقى:
– ٤ كوبيات فول ناشف.
– ربع كوباية عدس أصفر.
– جزراية مقشرة.
– ٢ ثمرة طماطم مقطعة لنصفين.
– ٢ ليمون بالقشر.
– ٢ فص توم
. بعد ما ننقع الفول ويتنقى كويس نحطه في دماسة الفول ونحط عليه العدس والجزرة والليمون والطماطم وبعد كدة نغطيه كويس أوووي ونحطه على نار هادية جدا لمدة ٨ ساعات، ولو إتحط في حلة الضغط ممكن يقعد ساعة ونص ساعتين ويببقي جاهز.
فيه ناس بتحط معلقة باكينج باودر عشان تسرع عملية الطهي بس الطريقة دي مش غاويها أووي
وإحنا النهاردة عندنا شوية وصفات للفول عجب تعالو نشوف هنعمل إيه:
“فول بالطحينة” :
٢ كوب فول مدمس.
زيت زيتون أو زيت ذرة عادي.
الطحينة عبارة عن ربع كوباية طحينة خام معاها معلقة خل و٢ فص توم مهروس ناعم أووووي ونقلب ونحط مايه دافية لغاية ما نوصل للقوام المطلوب.
نهرس الفول كويس على النار ونحطله ملح وفلفل أسود… وأول ما نقفل النار نحط عصير الليمون والكمون وخلطة الطحينة إللي لسة عاملينها ونقلب كويس ونحط الزيت حسب الرغبة ونقدمه مع شوية بقدونس على الوش.
“فول بالطماطم والبيض”:
هنشوح بصلة وسط في الزيت لحد ما تدبل وبعد كده نضيف فصين توم مفرومين ناعم وبعد كدة قرن فلفل أخضر مش حامي لحد ما يدبلو.
نحط اتنين طماطم من غير قشر ومتقطيعن صغير ونحط معاهم معلقة صلصة ونسيبهم يتسبكو بعد كدة نضيف الفول المدمس ونقلبه كويس أوووي ونحط عليه بقدونس مفروم.
نحط الفول في طاجن ونعمل فتحة بالمعلقة في النص ونكسر فيها بيضة ونحط عليها ملح وفلفل أسود وأول ما البيضة تستوي يتقدم وهو سخن.
“فول إسكندراني”:
هنحمر بصلة في طاسة لحد ما تدبل ونضيف عليها فصين توم مهروسين ونسيبهم يدبلو وبعد كدة هانحط الفول ونحط عليه معلقة شطة وكمون و فلفل أسود وملح ونرفع من عالنار ونحط شبت وبقدونس مفرومين وبعد كدة طحينة وزيت ذرة وعلى الوش نحط زيتون أخضر وأسود شرائح ومعاه شوية بصل مخلل على الوش للتزيين.
“فول بالسمنة (الطشة) والبيض”:
هانسخن الفول الحب كويس ونحطله كل التوابل بتاعته ونسخن سمنة الهانم لغاية ما تسيح تماما وتبقي شفافة ونحطها على الفول مرة واحدة ونغطيها و يا سلام لو نحمر في السمنة دي بيضتين مسلوقين ونحط عليهم ملح وفلفل أسود ونحطهم على وش الفول ونهرسهم.
“فول مع بطاطس بيوريه”:
– ٢ كوباية فول.
– ٢ طماطم متقطعة مكعبات صغيرة.
– بصل مفرومة.
– فلفل حامي متخرط رفيع.
– فصين توم.
– بقدونس مفروم.
– ملح و فلفل و كمون.
مقادير البطاطس :
– نص كيلو بطاطس.
– معلقة كبيرة سمن الهانم.
– ٢ بيض.
نسلق البطاطس ونهرسها وهي ساخنة مع سمن الهانم والملح والفلفل، نضرب البيض بالشوكة كأنه أومليت ونضيف تلاتة أرباع الكمية للبطاطس.
نشوح البصل في الزيت لغاية ما لونه يبقي دهبي ونضيف التوم ونقلبه وبعد كدة ننزل بالطماطم المكعبات لغاية ما كل المكونات تدبل وبعد كدة نضيف عليهم الفول والبقدونس ونقلب تقلبتين، نجيب صينية وندهنها بسمن الهانم ونفرد فيها الفول كويس وبعد كدة نفرد البطاطس البيوريه على الوش لغاية ما الفول يتغطي تمام وندهن وش البطاطس بكمية البيض المتبقية وندخلها الفرن على درجة حرارة متوسطة لغاية ما وشها يبقي ذهبي.
وبالهنا والشفا يا هوانم
كتب بواسطة مدون وناقد الطّعام الذواقة محمد صلاح
#الهانم #قصة_تانية_خالص #بهاريز_صلاح
المياه بتكوّن الغالبية العظمى من جسمنا وعلشان كدة المياه والسوائل لازم تكون أكتر بكتير من الأكل بالذات لو الجو حر وبنعرق وبنفقد سوائل كتير.
علشان كدة المرة دي كل كلامنا عن العصاير وبس.
١- تعالوا للمشروب الأساسي إللي بننصح بيه لفايدته وطعمه الرائع:
إحنا بنعمل مقدار كركديه ونفس المقدار تمر هندي ونفس المقدار عصير توت أو خروب (هتلاقوه في السوبر ماركت بماركات مختلفه) وبنزود عليهم كلوب صودا عشان يقلب يبقى عصير غازي ومعاه مكعبات تلج.
٢- العناب:
كلنا بنشرب العناب في الكفايهات ونفسنا نعرف بيعملوه إزاي؟
هو عبارة عن كوباية كركدية وكوباية تمر هندي … والسر الأعظم للعناب هو رشة كاكاو (غير محلى) على الوش ونقلبها كويس.
٣- عصير الجلاب:
الجلاب عصير مشهور في المطبخ اللبناني وهو عصير منعش وجميل بالذات للي بيحب ماء الورد، بيتباع مركز وجاهز للتحضير في السوبرماركت الكبيرة وبيبقى عبارة عن منقوع الزبيب أو التمر.
التحضير:
كوباية عصير جلاب مركزة.
عليها كوبايتين مياة باردة.
عليها معلقتين سكر كبيرة ومعلقة مياه ورد وكوباية تلج مجروش وصنوبر وزبيب وفستق حلبي أخضر … الوصفة دي هتبهر ضيوفك.
أما بقى العصاير المنعشة فهنعمل شوية عصاير مختلفة هتبقى عظيمة يا هوانم علشان كلها فاكهة فريش.
٤- عصير سنجريا:
ده عصير إسباني أصلا عبارة عن مزيج من الفواكه متقطعة زي الليمون والبرتقال والكمثري والموز والتفاح والخوخ، كل ده يتخلط مع كوبايتن عنب أحمر وكوباية عصير تفاح وكوبايتن عصير برتقال وكوباية عصير ليمونادة غازية.
٥- عصير البرتقال:
كلنا بنحب البرتقال بس الوصفة دي خطيرة، إحنا عايزين ٥ برتقال من الأحمر لو مفيش يبقى ممكن جريب فروت أحمر ٣ حبايات بس و اتنين برتقال من العادي وعايزين قشرة برتقالة كاملة.
نعصر كل البرتقال ومعاهم الجريب فروت ونحط عليهم نص كوباية سكر بني نقلب كويس أوووي وبعد كدة نحط قشر البرتقال ونسيبهم شوية وبعد كدة نصفي كل العصير ونحط كوباية كلوب صودا غازية ونزين بشرايح لمون ومكعبات تلج.
٦- عصير كالفادوس:
عارفين الأزايز إللي عاملة زي أزايز الشمبانيا في السوبر ماركت الكبيرة دي عبارة عن عصير عنب أو تفاح أحمر غازي بدون كحول، نحط إزازة كاملة منه على نص لتر عصير أناناس ونزينها بالكريز المحلي.
آخر حاجة بقي
٧- هنعمل الموخيتو المكسيكي:
معلقتين سكر ونحط عليها ١٠ ورقات نعناع أخضر فريش مفرومين عليهم نص كوباية ليمون أضاليا مسكر وعليهم علبة مشروب غازي بطعم الليمون ومكعبات تلج وقطع مانجو رفيعة جدا وشريحة لمون أضاليا.
و بالهنا والشفا يا هوانم.
كتب بواسطة مدون وناقد الطّعام الذواقة محمد صلاح
#الهانم #قصة_تانية_خالص #بهاريز_صلاح
