مساء الفل يا هوانم، بننصحك تتجنبي إنك تشتري الفسيخ من مصادر غير موثوقة، علشان كدة هنقولك مع الهانم إزاي تعملي الفسيخ في البيت.
أولاً خلونا نتفق إن احنا هنجيب كل الخامات طازة ونوعية كويسة، يعني السمك إللي بيتلف في أكياس وورق ده ننساه خالص.
ورقة وقلم يا هانم واكتبي ورايا المشتريات:
– ملح خشن علبة أو كيس نوعية نضيفة أرجوكم عشان صحتكم بس.
– ٣ معالق شطة ناعمة.
– ٢ معلقة كركم.
– ٢ معلقة كمون.
– عشبة حشيشة اللمون هتلاقوها في السوبرماركت بسهولة.
– أكياس تلاجة شفافة كتير.
– كيلو سمك بوري طازة وسط، لا كبير أووي ولا صغير أووي، سمكتين أو تلاتة بالكتير تقريباً، حاولوا على قد ما تقدروا يكون بحري مش مزراع أو متربي في مصارف.
نخش على التنضيف:
السمك بيتغسل كويس أووي وخياشيمه بالذات لازم تتغسل تمام لغاية ما تبيض بدل اللون الأحمر ويطلع منها زلال أحمر كده بعد الغسيل.
بعد كده لازم السمك يتعلق، يتعلق إزاي معرفش، ممكن تربطوه في دوبارة ويتحط في وضع عمودي بأي شكل لغاية ما يتصفى تماما لمدة ٦ ساعات في درجة حرارة الغرفة وبعد ما كل مياه الغسيل تنزل والسمك ينشف تماما تيجي مرحلة التمليح.
#ملوحظة: أوعي حد يقشّر قشر السمك أو يفتح بطنه وينضفها عشان هو كدة يبقى باظ.
نخش علي مرحلة التمليح:
معروف إن السمكة بتفسد من راسها، عشان كدة إحنا بنخلط الملح والشطة والكركم والكمون كويس ونبتدي نحشي بيهم الخياشيم والراس لغاية ما تتملي تماماً.
اتملت خلاص، نُفرك جسم السمكة بالخلطة ديه وقبل ما نرصها جوه أكياس في التلاجة، نرمي شوية من الخلطة و نكسر حشيشة الليمون بإيد الهون مثلا تتكسر بس مش تتقطع و تتحط جوة الكيس.
بعد كده نحط السمك عليها ونحط عليها من الخلطة ونِرُص السمك واحدة عكس التانية، بعد كدة نحط السمكتين التانيين ونغرقهم بالخلطة برضه … وهما خياشيمهم لفوق.
نلف الكيس كويس أووي ونحاول نفرغ الهواء منه على قد ما نقدر ونلفه في أكياس تاني كتير، ونحطه في علبة إزاز نضيفة ونسيبه في حتة دافية ومعتمة شوية في المطبخ ومن حين لآخر نقلّب العلبة على كل الأوضاع ومنفتحش عليه خالص غير يوم الاستخدام أو قبله بيوم.
مدة التخليل:
الهوانم اللي هتسأل نسيبه قد إيه من الاخر يا ابو صلاح؟؟
– لو الهانم إللي عايزاه في أول الطعم الحادق يبقى من ٧ ل ١٠ أيام.
– لو الهانم إللي عايزاه حادق معقول يبقى من ١٠ ل ١٥ يوم.
– لو الهانم إللي عايزاه حادق أووي، يبقى سيبوه من أسبوعين ل ثلاثة أسابيع.
الفتح:
العملية دي بتستلزم مشبك الغسيل على مناخيرك وأنبوبة الاكسجين جنبك و٣ صابونات ومعاكي الدفاس وأبو دهشوم وانزل معايا الملاحة، فتحت الأكياس وطلعت السمك خلاص؟
نضفي القشر إللي عليه بالسكينة، وافتحي بطنه ونضفيها كويس وشيلي سلسة الضهر واتفرجي بقى على اللون البمبي للسمك هيبقى عامل إزاي من جوه..
وأخيراً بقى، هناكل:
زيت ذرة كتير وليمون و مياه بصل متصفية تماما وبصل أخضر، أنقع الفسيخ فيهم قبل الأكل بيوم، ممكن يتحط في التلاجة لمدة شهر بس يتغطي بالزيت تماما أو في الفريزر لمدة ٦ شهور، ومعاهم شوية عيش بلدي طازة وعيشوا بقى يا هوانم.
بالنسبة للرنجة للي مالوش في الفسيخ، حسب بقي انت عايزاها إيه؟؟
بتحبيها مالحة هتشويها ع النار، بتحبيها دِلْعة هتنزليها وتطلعيها في مياه سخنة مرتين عشان تنزل ملحها.
وده طريقتي انا بقى:
انا بحط طحينة وزيت وبصل حلقات وليمون وبصل أخضر وأقلبهم كويس وبعدين أخلي الرنجة من الشوك وآبيّتها في الخلطة، وقبل التقديم بحطلها طماطم.
وديه طريقتي للترما، إللي هي بطارخ الرنجة الناعمة:
معلقتين سمن الهانم بدرجة حرارة الغرفة + بطارخ الرنجة + ٢ عصير ليمونة + ١ بشر ليمونة + معلقتين زيت.
ممكن كمان معاهم معلقة مايونيز او مسطردة حسب الرغبة أو شطة لو عايزين، ونضرب كل ده في الخلاط.
وأخيراً البطارخ المحببة :
معلقتين مايونيز + بطارخ الرنجة + كابر + ١ عصير ليمونة + ١ بشر ليمونة + معلقتين زيت + ماية بنجر، ونضرب كل ده في الخلاط..
وخلطة البصل عبارة عن زيت زيتون + خل بلسمك + ليمون + خل عادي + شطة
بالهنا والشفا عليكم يا هوانم
تقديم الشيف وناقد الطعام محمد صلاح
#الهانم #قصة_تانية_خالص #بهاريز_صلاح
إزاي اشتري خروف العيد؟
عشان نعرف إزاي نشتري خروف العيد لازم نعرف حاجات كتير أبسطها سلالات الخرفان إللي في مصر .. أنواع العلف إيه سواء برسيم، دريس، ذرة، علفة مصنعة، تفل زيتون، حبة بركة.. إلى آخره
بيعيش إزاي، بيستحمي ولا لأ بيعامل بآدمية ولا لأ بيذبح أصلا بآدمية ولا لأ.. كل الحاجات دي إللي تخليك تاخدي خروف محترم في العيد يطلع أضحية تليق بالمنسك الشريف ده.
تعالوا نشوف أنواع الخرفان في مصر إيه الأول:
أوسيمي ورحماني وبرقي وفلاحي وصعيدي وعبيدي وسوهاجي أشهرهم طبعا الأوسيمي و الرحماني
-أحلاهم بالنسبالي على الأقل- البرقي إللي بيعيش على طول خط الساحل والضبعة ومرسى مطروح وبيتغذي على أكل الصحرا إللي بيطلع رباني وبيميزه ليته الصغيرة وفروته البسيطة ودهونه القليلة وطعمه الجميل إللي بيستوي بسرعة وتصفيته لحوالي خمسة وخمسين من وزنه لحم صافي مقارنة بغيره من السلالات بس عيبه إنه مش حلو في الشوي نظرا لقلة دهونه لكن ممتاز في السلق والفرن.
طيب ايه موصفات خروف العيد!
*أول نقطة لما تروح تشتري خروف بلاش تشتري من مصدر مجهول أو من عند جزار أو شادر في الشارع عشان دول ممكن يكونوا بيأكلو الخروف أي حاجة فبالتالي هيبقى الطعم أي حاجة.. اشتريه أحسن من مزرعة عشان بيكون فيها متخصص في تسمين وتحضير الأعلاف لأن ده بتكون نتيجته لحم أطعم و جودة أعلى وملهاش ريحة وحشة.
*
عند الأضحية الشرعية عمر الخرفان ما ينفعش يقل عن ست شهور والجديان عن سنة والبقر عن سنتين والجمال عن خمس سنين ويكون الخروف ذكر أملح أقرن (قوي و عنده قرون)
*الخروف لازم يكون مفرود القامة مش مطاطي
*ميكنش هزيل وضعيف و يكون بيقبل على العلف مش بينفر منه، إقباله على العلف من إدباره عنه بتمثل حالته الصحية
*لازم تكون حالة العيون صحية.. لا فيها احمرار أو مطفية.. تكون بيضاء براقة مش مدمع أو معمص أو في إفرازات حوالين العين
*نفسه سهل ومنتظم ومن غير إفرازات أو مخاط
*الخروف يكون منتبه ومصحصح لو شديته من وسط القطيع تلاقي منه مقاومة ورجوع سريع للقطيع.. المستسلم الضعيف ده بيكون مريض
*حالة الفروة لازم تكون نظيفة و بدون شوائب أو حشرات
*لازم تكشف على حالة الأسنان عشان بتدل على العمر والصحة لو الأسنان في طول واحد وحجم واحد ده بيدل علي إن سن الخروف لسة صغير ولو لون الأسنان أبيض مش مبقع أو مكسرة، لو العكس من اختلاف حجم الأسنان وطول وتناسق صف الأسنان فده يدل إن الخروف بدء يسنن و إنه ابتدى يكبر، إللي عنده سنة بيكون عنده 8 ضروس لبنية ولو عدى السنة للسنة ونصف بيكون عنده ضرسين كبار في النص والباقي حواليه ضروس لبنية
*الخروف فيه لحمة ولا لأ.. أيوه في خرفان ضعيفة أو عيانة بتبقى خالية من اللحم.. حط إيدك على ظهر الخروف ولو عرفت توصل أو تمسك العمود الفقري يبقي الخروف ما بياكلش لمرض أو لقلة العلف، لكن لو كان سمين و مش عارف توصل للعظم يبقى هو محمل لحم كويس
*لية الخروف لازم ميعديش مستوى الركبة وبالذات لو بلدي أو فلاحي.. والخروف البرقي ليته صغيرة أصلا
*لو بطن الخروف مش متناسقة مع جسمه وتحسها أكبر أو منفوخة ده غش تجاري، الخروف بيكون شارب مياه بملح لحد ما يتنفخ عشان يتقل ويوزن على الميزان.. سيبه و امشي
دي أهم حاجات في مواصفات الخرفان عموما وفي موصفات خروف العيد بالأخص
كتب بواسطة الشيف وناقد الطعام محمد صلاح
#الهانم #قصة_تانية_خالص #بهاريز_صلاح
دلوقتي تقدري تشتري سمنة الهانم اونلاين من خلال اللينك ده https://cutt.ly/noJwOcH
مساء الفل يا هوانم،
النهاردة هنعمل وصفة سهلة جداً انتشرت بقالها فترة في أوساط السوشيال ميديا وهي وصفة الحلة الواحدة.
هنعمل حلة الفراخ بالمكرونة وش بيتزا، بس هنعملها بطريقة صح عشان مافيش حاجة تبوظ حاجة أو طعم يطغي على طعم تاني وهنعملها صحية كمان وبطريقة احترافية
المكونات:
فرخة بيضاء متقطعة على ٨ قطع
٣ بصلات كبار
٣ معالق كبيرة صويا صوص
٥ فصوص ثوم
حبتين فلفل رومي أخضر
٨ ورقات ريحان أخضر
كوب سمنة الهانم
كيس مكرونة خواتم ٤٠٠ جرام
١٠٠ جرام مشروم
١٠٠ جرام طماطم مجففة
علبة ذرة حلوة
٥٠ جرام زيتون أسود مخلي مقطع شرائح
١٠٠ جرام جبنة شيدر
١٠٠ جرام جبنة موتزريلا
قرن فلفل حار (اختياري)
الطريقة:
هنقطع البصل شرايح وندعكه بملح وفلفل أسود ونحطه في حلة كبيرة مع معلقتين سمنة الهانم ومعلقتين زيت زيتون، أول ما البصل يبتدي يدبل نحط معاه الفراخ ونشوحها كويس لحد ما تبتدي تاخد لون نحط ٣ معالق صويا وفصين ثوم كاملين ونقلب كويس ونحط نص كوباية مياه ونقفل الحلة كويس، أول ما تبتدي تغلي نشيلها ونحطها على أصغر عين بوتجاز لمدة نص ساعة ومنفتحش عليها خالص.
خلوا بالكم يا هوانم البروتين يحب النار الهادية مش الحامية او العالية بالطريقة دي يستوي أسرع.. أنت بس ما تفتحيش عليها على ضمانتي.
بعد النص ساعة هنحط الطماطم المجففة ونقطع المشروم شرايح ونصفي الذرة الحلوة ونغسلها من المحلول إللي كان فيها ونضيفها في الحلة ونقطع معاهم ٣ فصوص ثوم شرائح وممكن نحط قرن الفلفل حسب الرغبة.. نحط كل المكونات دي في الحلة ونقلب كويس ونقفل لمدة عشر دقائق بالظبط.
نحط بعد كدة كيس المكرونة مباشرة من الكيس مع كوباية مياه سخنة ومعلقتين سمنة الهانم ومعلقتين زيت زيتون ونضيف شرائح الزيتون الأسود المخلي والفلفل الرومي الأخضر المقطع ونضيف شرائح المشروم ونقلب كويس كل المكونات دي ونقفل الغطاء لمدة عشر دقائق كمان عشان مش عايزين المكرونة تبقي طرية أوي وتنزل كل النشاء إللي فيها عشان هيبقي طعمها مش مستساغ.
قبل ما نقفل النار مباشرة نحط الجبنة الشيدر المبشورة والموتزريلا مع ورق الريحان على الوش من غير ما نقلب ونسيبها دقيقتين بس.
لما هنفتح غطاء الحلة هنلاقي وجبة متكاملة من البروتين والخضار والنشويات مع وش البيتزا الوهمي الجميل إللي كلنا بنحبه.. كل ده في خمسين دقيقة بالظبط وبالهنا والشفا يا هوانم
كتب بواسطة ناقد الطعام والمدون محمد صلاح
#الهانم #قصة_تانية_خالص #بهاريز_صلاح
مساء الفل يا هوانم النهاردة معانا وصفة كلنا بنحبها صينية سمك بوري بالبطاطس والكريمة
وصفة سهلة مش صعبة فيها بس حتة مهمة إمتى نحط السمك على البطاطس علشان الإتنين يستو فى نفس الوقت ومحدش يستوي قبل التاني
بس الأول تعالوا نعرف مواصفات السمك الكويس الطازج إيه:
– السمكة تكون بتلمع ولما تمشي إيدك عليها تلاقيها بتجري مش بتقف
– عينها بتلمع وشفافة مش مطفية أو الرمادي المطفي «دي بقالها أسبوع فى التلج خلي بالك»
قشرها ثابت مش بيطلع بسهولة
ريحتها حلوة مش ريحة السمك «هتلاقي ريحتها ريحة البحر»
لما تدوسي على بطنها ما تسبش أي أثر وترد بسرعة لكن لو صباعك ساب أثر أو دخل لجوة تبقى سمكة قديمة
طبعا خياشيمها أحمر فاتح مش لون تاني
دي شروط السمك الطازج ارفضي أي سمك يجيلك مافيهوش المواصفات دي
تعالوا بقى نعمل صينية السمك
هتخلي السمك متنضف من قلبه أو مقفول دي حسب رغبتك وحسب موسم البطارخ
النهاردة هنعمله متنضف من قلبه و من القشر و هنعمله بس خلطة بسيطة من جوة عبارة عن
– فصين ثوم لكل سمكة
– ملعقة كمون
– عود زعتر أخضر
– ورقتين ريحان أخضر
– ملح وفلفل أسود حسب الرغبة
هنضرب دول في الهون و نعمل ٣ فتحات صغيرين في ظهر السمكة ونحشي بيه الظهر وقلب السمكة وفي كل فتحة من التلاتة هنحط شريحة ليمون
نسيب السمك بقى و نعمل صينية البطاطس
– الأول هنقطع ٣ بصلات كبار شرايح رفيعة
هنحط علي البصل ملح و فلفل أسود «حسب الرغبة»
وبعد كدة نفرك البصل كويس أووى لحد ما يتهرى وينزل السوايل إللى جواه
ونحط بعد كدة شرايح البطاطس بتاعت الطبخ مش التحمير خلى بالكم من النقطة دى «بطاطس طبخ مش تحمير»
نحط معاها فصين ثوم مع واحدة فلفل رومى أخضر مفرومين ناعم و معلقتين كبار سمنة
الهانم ونخلطهم كويس
ونحط معاهم كوباية مياه كبيرة أو مرقة فراخ حسب التوفر
وندخل الصينية فى فرن سخن لمدة ١٠ دقايق
بعد كدة نحط كريمة الطبخ ونحط معاها السمك
وندخلهم الفرن لمدة ربع ساعة متغطين بورق فويل على درجة حرارة ١٦٠
نتأكد إن فيه كمية كريمة متقلش عن نص لتر وإن السمك فى نص الصينية متحاوط بالكريمة كويس، بعد الربع ساعة هنشيل ورق الفويل ونسيب الصينية لمدة عشر دقايق في الفرن على درجة حرارة ١٨٠
ولما تطلع نقطع عليها بصل أخضر شرائح رفيعة و بشر ليمون وتتقدم مباشرة و بالهنا والشفا يا هوانم
#بهاريز_صلاح #قصة_تانيه_خالص
مساء الفل يا هوانم الشتاء دق الأبواب… و طبعا عارفين شتاء معانا يعني عدس … النهاردة هنعمل عدس جديد ومختلف بكذا طريقة
المكونات:
– كيلو عدس
3 جزرات متوسطين
٢ بصل أبيض كبير
٣ سيقان كرفس فرنساوي عريض
٤ فصوص ثوم
نص حزمة بقدونس
نص حزمة كزبرة
نص كيس شعرية
معلقتين سمنة الهانم
ربع كوب كريمة لباني « على حسب الرغبة»
مواسير عظم بقري منشورة صغير أو بالعرض
(حسب الرغبة.. بس صدقوني هتحبوها أووي)
بوصوا بقى يا هوانم … أي بقوليات لازم تتنقع خدوها قاعدة كدة ..مش عشان التسوية و بس لأ ..ده عشان القشرة الخارجية دي عادة تخرج كل اللي جواها وما تتعبش القولون خاصة إن أغلب المصريين قولونهم مش مظبط عشان كدة ننقع العدس الأصفر في مياه على الأقل قبل الاستخدام بساعتين مع تغيير مياه النقع كل ساعة ونحط العدس في حلة فيها مياه باردة الأول مش مياه سخنة.. المياه السخنة هتخلي العدس الأصفر ياخد معاكي في التسوية وقت أطول ويخلي القشرة الخارجية أشد
نحط في الحلة الجزر متقطع ومعها البصل والكرفس المتقطعين وكمان مواسير العظم المتقطعة دي عشان هتنقل الطعم نقلة تانية خالص
مقدار المياه في الحلة بيكون ٢ كوب مياه لكل كوباية عدس أصفر.. أول ما بيغلي العدس بيطلع شوية ريم على الوش عادي ده نتيجة البروتين إللي جوه العدس، مش العدس مش نظيف زي ما الناس فاكرة .. نشيله و نرجع نغطيه تاني أول ما العدس يطرى ويوصل
للقوام المطلوب.
بنضربه في الخلاط أو الهاند بليندر و نصفيه كويس عشان لو فيه أي شوائب.
كدة خلاص عندنا أساس نقدر نعمل بيه أي حاجة
-أول طبق هيبقى شوربة العدس العادية بس بالتوست والأعشاب كل المطلوب شوية كزبرة خضرا وبقدونس متقطيعن رفيع أوي ومعاهم شوية ثوم مفروم طازج ،ملح ،فلفل أسود وزيت زيتون هتخلطوهم كويس وبعد كدة هنقطع توست مكعبات ونخلطهم مع بعض كويس وندخلهم الفرن على درجة حرارة ١٢٠ لمدة نص ساعة أو لحد ما التوست يتحمص نحطهم على وش شوربة العدس قبل التقديم مباشرة.
الوصفة التانية فتة عدس
الفتة إللي تشبع و تدفي.. بنفس الشوربة إللي عندنا.. هنقطع ٢ رغيف عيش بلدي مربعات ونحط فوقه ثوم بودر ومعلقتين سمنة الهانم و ندخلهم الفرن لحد ما يتحمصوا كويس وننزل عليهم بالشوربة ونسييح معلقة سمنة الهانم وعليها معلقة فلفل أسود ونطشها على الفتة وتتقدم مباشرة.
الوصفة الثالثة
لسة عندنا أساس إللي هو شوربة العدس
في طاسة صغيرة هنحط معلقة سمنة الهانم ونحمر فيها نص كيس شعرية لحد ما تتحمر وننزل عليها واحدة واحدة عشان هتفور جامد بأي نوع شوربة أو مرقة لو ما فيش يبقى مياه دافية مش عايزين نكتر مياه أو مرقة عشان إحنا عايزنها تشرب من شوربة العدس أول ما الشعرية تطرى شوية نحطها مع الشوربة.. ونقلب كويس لحد ما الشعرية تشرب من شوربة العدس كويس نقطع كزبرة وبقدونس ومعاها ٣ فصوص ثوم مفرومين ناعم ومعلقتين كزبرة ناشفة لسة متحمصة ومطحونة طازة … لازم متحمصة ومطحونة طازة دي آه لازم … جربوا بس وادعولي
وفي طاسة فيها معلقتين سمنة الهانم ننزل بالتوم والكسبرة وبعد كدة الخضرة ونغرف في طبق غويط ونطش الطشة دي في ساعتها وممكن معلقتين كريمة لباني على الوش مع الطشة هتفرق كتير في الطعم وطبعا تتقدم في نفس الوقت
#الهانم #قصة_تانية_خالص #بهاريز_صلاح
مساء الفل يا هوانم النهاردة هنعمل وصفة سهلة وبسيطة و موجودة في السوق كتير
عشان هي موسم هنعمل فطيرة بف بيستري محشية قرع عسل بالخضار والسجق
المكونات:
حبة قرع عسل كيلو
نص كيلو بطاطس
ربع كيلو بسلة خضرة
واحدة بصل أبيض
2 فص ثوم مفروم ناعم
2 ملعقة كبيرة سمنة الهانم
كرفس فرنساوى
نص كيلو سجق
كيس عجينة بف بيسترى قطعة واحدة كبيرة
بهارات و جوزة الطيب
بيضة مضروبة
معلقتين كبار سمسم أبيض
معلقة حبة البركة
ملح و فلفل أسود
الطريقة:
هنقشر قرع العسل و نقطعه و نسلقه في كوباية مياه
(مش محتاجين مياه كتير عشان هو كدة كدة هينزل مياه ) فيها معلقة ملح لحد ما يطرى خالص نرفعه و نصفيه من المياه تمام
في طاسة هنحط معلقتين كبار سمنة الهانم و هنقطع البصل مكعبات صغيرة و معاه سيقان الكرفس و نقلب تقلبتين و بعد كدة ننزل بالبسلة الخضرا و البطاطس المتقطعة مكعبات وسط و تتقلب كويس عشان مش محتاجين الخضار ياخد لون هو يدبل بس بعد كدة هنحط السجق المتقطع مع الخضار و نقلبه لحد ما ياخد لون حلو و بعد كدة ننزل بالثوم المفروم و البهارات و رشة جوزة الطيب و تقليبة كمان و نطفي النار في صينية وسط هنرش شوية دقيق خفيف و ناخد نص كمية عجين البف بيستري و نفرشه في الصينية من تحت و بعد كدة نحط معلقة سمنة الهانم و نفرشه فوق العجينة و ناخد نص كمية بيوريه القرع و نفرشها كويس فوق العجين و ناخد كل الخضار و البطاطس و السجق المتشوح ده و نحطه في النص و ننزل بآخر طبقة من بيوريه قرع العسل و بعد كدة نغطي بالنص التاني من عجينة البف بيستري و نتأكد إنها غطت الصينية كلها من فوق و متقفلة من كل الجوانب و بعد كده نعمل كذا شرطة بالسيكنة عشان نطلع البخار و ندهن وش الصينية كويس بالبيض المضروب و بعد كدة نرش السمسم الأبيض و حبة البركة و ندخل الصينية جوة فرن حامي على درجة حرارة ١٣٠ لمدة ٤٥ دقيقة و لما تطلع سيبوها تهدى قبل التقطيع الصينية دي هيحبوها الأولاد الصغيرين قبل الكبار عشان فيها الطعم الحلو و الطعم الحادق
#الهانم #قصة_تانية_خالص #بهاريز_صلاح
محتاجين أكلة حرشة تفتح النفس كدة … اعتقد مافيش أحلى من شوية كشري مشطشطين بس مش بأي صلصة ده إحنا هنعمل صلصلة مشطشطة بالسجق كمان عشان يبقى كشري اتنين في واحد.
يلا بينا نعمل الوصفة:
أول خطوة:
هننقع ربع كيلو حمص قبلها بيوم ونغير عليه المياه مرتين وبعد كدة نسلقه في ٢ لتر مياه باردة لحد ما يطرى وبعد كده ننقع كيلو إلا ربع عدس بني في مياه لمدة ساعتين ونغير عليه المياه مرة واحدة بس
و بعد كدة نسلقه في حلة فيها ٢ لتر مياه باردة وفيها ٥ معالق كمون لسة مطحون وبصلتين متقطعين وملح وفلفل أسود وأول ما يطرى هنشيله على جنب عشان يبرد.
تاني خطوة:
الصلصة الحمراء:
هنقطع بصلتين كبار ناعمين جداً ومعاهم فصين توم مفرومين ونشوحهم في معلقتين كبار سمنة الهانم ومعاهم معلقتين زيت كبار وأول ما البصل يدبل تماما وقبل ما ياخد لون ننزل عليه بكيلو طماطم معصورة متصفية من البذور بتاعتها ونحط معاها معلقتين كبار صلصة ومعلقة بابريكا كبيرة ونفرم معاها حبة بنجر مسلوقة … أول ما الصلصلة تغلي ونزودلها مياه مرتين لحد ما يطلع منها زيت على وش الحلة، كدة تبقى استوت و بقت ممتازة.
ثالث خطوة:
هنعمل الورد أو البصل المقلي سر البصل المقرمش الذهبي ده ٣ حاجات إنه يكون بصل أبيض مش أحمر وزيت كتير سخن بجد ونحط مقادر كفاية من الدقيق والنشا على البصل ونقلبه كويس عشان باقي الدقيق ينزل، نحمر البصل.
رابع خطوة:
ناخد كوباية كبيرة من زيت القلي ده لكيلو رز بلدي ونقلبهم كويس وبعد كدة ننزل عليهم بكمية العدس كاملة أو حسب انتوا بتحبوا العدس قد إيه ونزود مياه بمقدار عقلة ونص فوق الرز والعدس ده وأول ما الكشري يتشرب نوطي النار تمام ونحط من تحته الشياطة.
خامس خطوة:
هنسلق مكرونة سباجيتي سلق عادي مياه وملح بس نطلعها ونحطها في حلة تانية نحط فيها شوية زيت زيتون وملح وفلفل أسود حسب الرغبة ونقلب تقليبة والتانية ونقفل النار.
المكرونة الشعرية هنحمرها في معلقتين سمنة الهانم لحد ما تاخد اللون البني الفاتح وبعد كدة ننزل عليها بالمياه السخنة، خلي بالكم عشان هتفور يا هوانم … ونوطي عليها النار لحد ما تستوي.
سادس خطوة:
هنعمل الدقة البيضا … ١٠ فصوص توم مدقوق طازة عليه ملح وفلفل أسود حصى مدقوق طازة ومعاه حبتين فلفل رومي بارد مفرومين في الكبة أو الهون و ننزل عليهم بنص كوباية ليمون ونص كوباية خل أبيض وكدة الدقة جاهزة.
سابع خطوة:
الشطة الحامية بالسجق:
هنقطع بصلة كبيرة ناعم أوي و نشوحها مع معلقتين سمنة الهانم وأول ما تدبل نحط عليها كيلو سجق سليم من غير ما يتقطع ونقلب لحد ما يوصل لنص سوى وبعد كدة ننزل عليه بقرنين فلفل أحمر حامي متقطع رفيع ومعاه معلقة شطة كبيرة وبعد كدة ننزل ب ٣ معالق صلصة تقيلة ونقلب كويس وبعد كدة نبتدي نقطع السجق حتت صغيرة بالمعلقة هتلاقوه بيتقطع ببساطة و ننزل عليه ب لتر مياه سخنة أول ما تغلي نحط معاه نص كوباية خل أبيض وقطع طماطم رفيعة.
كدة خلصنا وصفتنا.
تعالو نركب الطبق:
هنحط العدس والرز الأول وبعد كدة المكرونة البيضا وننزل عليها بالشعرية المحمرة وبعد كدة نحط الصلصلة الحمرا والدقة البيضا وبعدها البصل المحمر وبعده الحمص وفي الآخر نحط الشطة الحامية بالسجق
و بالهنا والشفا عليكم يارب يا هوانم
كتب بواسطة ناقد الطعام والمدون محمد صلاح
#الهانم #قصة_تانيه_خالص #بهاريز_صلاح #عيد_سعيد
صباح الفل يا هوانم ، متيجوا نعمل النهاردة شوية رنجة ولوزامها بطريقة جديدة مع الطريقة التقليدية إللي بعملها في صوص طحينة وليمون وشبت، بنجيب الرنجة لو عايزين طعم التدخين يبان أووي بنحطها على عين البوتاجاز فوق الشياطة، ده هيخلي ملحها طبعا يزيد وطعم التدخين يبان أكتر ودي يفضل فيها الرنجة خفيفة التمليح.لو الرنجة ملحها كتير يبقي هنسخن مياه على النار وننزل فيها الرنجاية مرة واتنين وإحنا ماسكينها من ديلها وكدة يبقي الملح خف كتير،صوص الرنجة بقى هنبتدي بالزيت والطحينة وليمونة أضاليا كبيرة، نقلب تقليبة كويسة وننزل بنص حزمة شبت ورق بس من غير سيقان وتكون متقطعة رفيع جدا ولو عندكم كابر حطوا ١٠ وحدات وبعدين نقلب تقليبة حلوة ونبتدي نخلي الرنجة ونحطها في التتبيلة دي ونحط معاها شرايح بصل أحمر وورق بصل أخضر وشرايح خيار وشرايح طماطم ونقدم على طول.الطريقة الجديدة بقى، الرنجة بالتخديعة هنقطع ٦ فصوص ثوم بالطول ونحط شوية زيت زيتون في الطاسة مجرد إنه ابتدى يدفى نحط فيه الثوم ونوطي النار (خلي بالكم يا هوانم إن الثوم بيتحمر بسرعة وممكن يتحرق لو مخدناش بالنا منه) أول ما الثوم يبتدي ياخد لون ننزل عليه بالبصل المتقطع شرايح رفيعة جدا ونقلب تقليبة سريعة، كدة هيكون التوم اتحمر خالص والبصل ابتدى يدبل، ساعتها نحط الطماطم المتقطعة مكعبات صغيرة ومعاها قرن فلفل أخضر حامي متقطع حسب الرغبة ونسيبهم يتسبكوا كويس أول ما نحس إن التخديعة دي وصلت للقوام المظبوط نحط قطع الرنجة المخلية ونقفل النار مباشرة ونرفع في طبق وهي دافية وتتقدم مع عيش بلدي مفقع.أما بالنسبة للبطارخ، هنعمل البطارخ بطريقة جديدة السنة دي، هنعملها بالحمص … خلوا بالكم يا هوانم أنا بعمل الأطباق دي كلها قبل ما أكتبها ومش عايز أقولكم طبق بطارخ الرنجة ده مع سلطة الحمص كان حلو إزاي.
هنقطع بصل أبيض ولازم يبقى أبيض شرايح رفيعة ونحط طاسة على النار فيها معلقة سمنة الهانم ومعلقة سكر كبيرة وعودين زعتر أخضر طازة ونسيبهم كدة على النار مع التقليب لمدة ساعة لحد ما البصل يتكرمل و يبقى لونه بني طري ولزق في بعضه، ممكن نجيب سلطة حمص جاهزة ولو إحنا إللي هنعملها يبقي ننقع كوباية حمص كبيرة لمدة ٢٤ ساعة في المياه مع تغيير المياه مرتين عليها ونحط الحمص مع مياه على النار مش أقل من ساعتين لحد ما يطرى خالص، وهو سخن نحطه في الخلاط مع علبة زبادي و٣ فصوص ثوم ومعلقة كمون ناعم وننزل بالطحينة و ربع كوباية ليمون واحدة واحدة لحد ما القوام يتظبط، مش هنحط ملح عشان البطارخ مملحة وبعد كدة ممكن ننزل بالبطارخ في الخلاط أو الهاند بلندر أو نهرسها بالشوكة وتبقي حسب الرغبة المطلوبة، نزود أو ننقص فيها في طبق غويط نقدم البطارخ و نحط عليها البصل المكرمل إللي عملناه في الأول ونحط معاها شوية بقدونس وزيت زيتون وتتقدم ….
كتب بواسطة المدون وناقد الطعام محمد صلاح Mohamed Salah El Dine
#الهانم #قصة_تانية_خالص #بهاريز_صلاح
مساء الفل يا هوانم، النهاردة وصفتنا وصفة إبهار … وصفة كل ضيوفكم هينبهروا لما يشوفوها ويدوقوها
و المميز برضوا إننا بنستخدم فيها كل بواقي درج التلاجة زي ما عملنا في الوصفة إللي فاتت.
بس المرة دي هنجيب لحمة من الأميرية، إيه هي لحمه الأميرية!!! دي عبارة عن حتة من ظهر الذبيحة بتبقى أقرب للكتف منها للمؤخره، عبارة عن حتة طرية جدا وفيها كمية دهن متوسطة بتوصل لحوالي ١٥ % من وزن القطعية، بتبقى طعمها ممتاز وبتبقى من قطع اللحمة المميزة جدا عند الجزار وأغلبية الجزارين عارفينها دلوقتي إنها اسمها بالانجليزي Rib Eye افرضي إنه مش عارفها لا بالانجليزي ولا حتى عارف إيه هي الأميرية، ساعتها قوليله هات حتة من الانتركوت المِحمل لو معرفش بعد كل ده غيري الجزار لأنه أغلب الظن مش جزار ومالوش علاقة باللحمة.
هنجيب أقل حاجة كيلو كامل منها على بعضه ونخليه يلفه دوائر مش شبكة … خمس أو ست دوائر مثلا وخليه يشكله و يربطه بشدة.
تعالو بقي نعمل التتبيلة بتاعته ياهوانم :
– كوباية سمنة الهانم كبيرة
– ٦ فصوص توم مهروسين ناعم تمام
– ٣ عيدان زعتر أخضر فريش مفروم
– عود روز ماري أخضر فريش مفروم
– معلقتين كبار صويا صوص
– ملعقة ملح كبيرة
– معلقتين فلفل أسود متحمص ولسة مطحون طحنة تكون خشنة مش ناعمة
– أعشاب بعد التسوية
– حزمة بقدونس صغيرة مغسول ومتقطع ناعم
– حزمة نعناع صغيرة مغسول ومتقطع ناعم
– حزمة شبت صغيرة مغسول ومتقطعة ناعمة
– عود زعتر أخضر فريش متقطع ناعم خالص
– ربع كوباية رز بلدي منقوع في مايه من ٥ ل ٦ ساعات
– بشر قشرة ٢ ليمون أضاليا بس دي بتكون قبل الاستخدام مباشرة واوعوا تبشروا الطبقة البيضا إللي جوه عشان دي هتبقي مرة .
هنتبل اللحم الأول بمعلقتين الصويا وبعد كدة هنحط الملح والفلفل الأسود الخشن.
في كوباية سمنة الهانم هنحط التوم المفروم الناعم والأعشاب الخضراء ونقلب كويس لحد ما نغطي حتة اللحمة تمام بالسمنة .
الفرن بتاعنا بيكون سخن.
لو عندنا شبكة نحطها علي الصينية وندخل الصينية على أعلى درجة حرارة لمدة ٢٠ دقيقة وبعد كدة تنزل لدرجة حرارة ١٦٠.
لو مفيش شبكة هنحط كل بواقي الخضار إللي في درج التلاجة تحت قطعة الأميرية، بصل طماطم جزر مشروم ورق جزر لفت فجل أي حاجة باقية في درج التلاجة… و هنا بقي مش هنغطي بورق فويل، إحنا هنا هنفتح كل ربع ساعة و بفرشاة أو معلقة حسب المتوفر هنجيب من السوائل إللي بتنزل من قطعة اللحمة وندهنها بيها تاني وندخلها الفرن تاني، متخافوش درجة حرارة الفرن مش هتقل زي ما انتوا فاكرين بالعكس تيار الهوا إللي هيدخل جوه هيطري حتة اللحم عشان بيلف حواليها كلها.
حتة الأميرية دي بالذات عشان مليانة دهون بتبقي عاملة زي حتة الزبدة حرفيا ومش محتاجة ندوس عليها جامد في التسوية فا حاولوا تطلوعها من الفرن وهي طرية شوية بعد ساعة ونص تقريبا، مش لازم تستوي لغاية ما يبقي لونها بني أو رمادي و والله ده مش دم وده مش حرام ده سائل بروتيني اسمه ميوجلوبين لونه بمبي كدة، ده المسؤول عن تثبيت الحديد والأكسجين في العضلات.
لكن لو انتوا مصممين يبقي سيبوا قطعة الأميرية دي لمدة ساعتين بس برضوا تدهنوها كل ربع ساعة زي ما اتفقنا
تعالوا بقي نحمر الرز الأول .. هنطلع الرز من المياه ونحطه في زيت القلي أول ما ينزل هينفش ويبقي عامل زي الكورن فليكس ويادوب يبقي لونه دهبي.
نقطع أعشاب إللي بعد التسوية رفيع خالص وبعد كدة نخلطها مع الرز ونبشر الليمون ونخلط كله مع بعضه.
نطلع اللحمة من الفرن وأول ما تطلع نقطع الخيط الملفوف بيها ونغطيها بالخضرة والنعناع الفريش إللي إحنا مقطعينه والرز الكرسبي إللي كان منقوع وحمرناه ومعاه بشر الليمون ونغطيها بالفويل على الأقل نص ساعة قبل التقطيع … ودي نقطة مهمة أوووي علشان نخلي السوايل إللي جوه حتة اللحمة ترجع تتوزع تاني جواها وتبقي أطرى.
وساعتها هتلاقوا طعم اللحمة مع الخضرة الفريش المفرومة ناعم مع الرز المقرمش ومع بشر الليمون عبارة عن انفجار للنكهات جوة بوقكم.
وتقدروا طبعا تاكلوا الخضار إللي كان تحت حتة اللحمة عشان ده بالذات هيبقي زبدة فعلا.
وبعد كدة نقطع بسكينة حامية جدا شرايح رفيعة
وبالهنا و الشفا يا هوانم.. لو عملتوها يا ريت تصوروها وتبعتلونا تجاربكم
كتب بواسطة المدون وناقد الطعام محمد صلاح Mohamed Salah El Dine
#الهانم #قصة_تانية_خالص #بهاريز_صلاح
مساء الفل يا هوانم
النهاردة ميعادنا مع أسهل وصفة ممكن تتخيلوها … الوصفة إللي بتخلي حتة اللحمة عبارة عن حتة زبدة … الوصفة اللي هتخليكي تبقي متقمصة دور الشيف بوراك التركي إللي بيمسك حتة اللحمة تتفصص من إيده وتقع من العظم … وعلي الرغم من إن شكل الوصفة صعب لكن هي من أسهل ما يمكن.
الطريقة دي اسمها Butter Roasting بالانجليزي.
كل المطلوب منك:
هتجيبي موزة ضاني أمامية.
وملح وفلفل أسود وبابريكا وكوباية كبيرة سمنة الهانم.
و بما إن العالم كله بيتجه للتوفير واستخدام كل الخامات الموجودة في التلاجة، إحنا هنعمل كدة برضوا، هنطلع كل الخضار إللي في درج التلاجة (طماطم، جزر، كرفس، فجل، كزبرة، بقدونس، بصل، مشروم، فاصوليا وبطاطس أو أي حاجة عندك) وإللي بقاله كذا يوم وبقي طري وشكله مش محبب للنفس أوي زي الخضار الطازج وهنقطع كل ده و هنحطها بمياه الغسيل بتاعتها في الصينية إللي هتدخل الفرن.
الأول هنتبل بملح وفلفل وبابريكا وحطي الملح في الأول متخافيش.
الملح مش بيخلي اللحمة تطول علي النار … دي إشاعة مغرضة ده العكس هو الصحيح.
بعد الملح والفلفل والبابريكا هندهن كل الموزة الضاني بسمنة الهانم ونغطيها بيها وبعد كدة هنغطيها بكذا ورقة فويل وتبقي محكومة الإغلاق.
الفرن لازم يبقي سخن من الأول وندخل الصينية علي درجة حرارة متوسطة 160 مئوية.
في نقطة مهمة هنا بقي … إحنا محتاجين نفتح الفرن كل ٢٠ دقيقة ونشيل الفويل ونعمل عملية اسمها Arosser يعني بنجيب من كل السوائل إللي بتنزل من اللحمة والخضار ونحطها تاني علي اللحمة ونغطيها تاني وندخلها الفرن المهم مش عايزينها محطوطة علي أرضية الصينية عشان مش عايزينها تتسلق إحنا عايزنها تتحمر فخليكوا متأكدين إن الموزة فوق كل بواقي الخضار إللي عندكم … طيب هنعمل كدة كام مرة … حسب وزن الموزة يعني لو كانت كبيرة هنعمل كدة أربع أو خمس مرات حسب درجة التسوية المطلوبة … لو وسط هتبقي ٣ أو أربع مرات لغاية ما تحسي إنها بقت طرية تمام وبتفك من نفسها.
في اللحظة دي شيلي ورق الفويل و شغلي الشواية لمدة ربع ساعة بس لغاية ما تاخد اللون المحمر الجميل .. و ساعتها تقدري تعملي عليهم الشو التركي زي ما تحبي
و بالهنا والشفا يا هوانم
كتب بواسطة المدون وناقد الطعام محمد صلاح
#الهانم #قصة_تانية_خالص #بهاريز_صلاح
مساء الفل يا هوانم …
هنعمل شوية فتة عجب النهاردة.
هنبتدي بالشوربة الأول:
من أحلى قطعيات اللحوم المناسبة للسلق بتبقى الرقبة الضاني
عشان كدة هنستخدم رقبة مقطعة … بس النهاردة مش هنحط اللحمة في مياه سخنة … هنحط اللحمة في مية الحنفية عادي ونحط فيها بصلة كاملة كبيرة … جزرة … سيقان كرفس مقشرة وهنحط حبهان ومستكة وقرنفل وورق لاورا
ونخلي المياه تبتدي تسخن … أول ما المياه تغلي هنوطي النار ونحط الحلة على أوطى عين بوتجاز.
ليه بنعمل كدة !!! الرقبة عبارة عن عضلات … العضلات دي مليانة كولاجين ودي مادة بروتينية شديدة … لما بنحطها في مياه مغلية بتشد وتغير تركيبة اللحوم … وعشان تستوي بتاخد وقت أطول طبعا … لكن لما اللحوم بتستوي في درجات حرارة هادية خالص يادوبك بتطلع فقاقيع صغيرة يبتدي الكولاجين ده يسيح وهو متدلع تماما ويبتدي يتحول لجيلاتين طري وبيدوب حتة اللحمة ويعزز نكهتها كمان، كل الخضار والتوابل دي بتضيف نكهة رائعة للشوربة.
طيب لما اللحمة غليت حصل إيه !!؟؟ ظهر ريم على وش المرقة … دي مش قلة نظافة في اللحمة … اللحمة أصلا ما بتتغسلش عشان غسيل اللحوم بيخليها بيئة خصبة للبكتريا
الريم ده عبارة عن تخثر بروتيني، ده بيظهر من أي حاجة فيها بروتين سواء خضار أو لحوم .. المهم هنشيل الريم ده عشان ممكن يعكر لون اللحمة ويغير طعمها
في الوقت ده هنكون بنقطع رغيفين عيش بلدي مكعبات ونرش عليه بودرة بصل ونحط عليه معلقتين كبار سمنة الهانم ونحمصه في الفرن أو نحمره على الطاسة زي ما تحبوا يا هوانم.
تعالو برضو واللحمة بتتسلق نعمل الرز … والرز بيحب السمنة … هنعمل رز أبيض
هنحط معلقتين كبار سمنة الهانم في حلة على النار ونحط كوبايتين رز، نقلبه تقليبتين وبعد كدة ننزل بكوبايتين ونص مياه … كوباية الرز الواحدة عليها كوباية وربع مياه ده المقدار المظبوط للرز إللي يخليه يطلع مفلفل وحلو.
بعد كدة أول ما الرز يتشرب نوطي النار خالص ونحط غطاء محكوم الغلق
وبالمرة تعالوا نعمل الصلصة كمان … هنبشر بصلة ناعم وندق فصين توم وفي طاسة نحط معلقة كبيرة سمنة الهانم ونشوح فيها البصلة والثوم و ما نخليهومش ياخدوا لون … يدووب يدبلو بس.
وبعد كدة ننزل ب ٣ طماطم متصفيين كويس ونسيبها تتسبك كويس وبعد كدة ننزل بمعلقتين صلصة ونسيبها عالنار لحد ما تطلع زيت على الوش وتتقل ويبقي لونها غامق وبعد كده نحط عليها ربع كوباية خل ونقلب تقليبة كويسة ونقفل النار ونبشر عليها نص حبة جوزة الطيب ونسيبها تهدى خالص.
الطشة بقى عبارة عن ٣ معالق كبار سمنة الهانم وعليها رشة ملح ومعلقتين كبار فلفل أسود مطحون طازه ونحطهم عالنار لحد ما الطاسة تفور شوية … خلي بالكم الطشة لازم تفضل سخنة على طول.
خلاص اللحمة استوت والمرقة بقت غنية وجميلة … تعالو نركب الطبق على بعضه،
في طبق غويط هنحط العيش المتحمص ونحط يا دوب مغرفة مرقة ومغرفة رز ومغرفة صلصة ومعلقة من الطشة ونقلب كويس ونغطيه ونسيبه ٣ دقايق مثلا.
إحنا مش عايزين العيش يبقى طري خالص وبايش .. إحنا عايزينه فيه سنة قرمشة نشيل الغطا ونحط مغرفتين كبار شوربة ونحط معلقة طشة وملعقة صلصة كبيرة وبعد كدة نحط كل الرز إللي فاضل ونغطي الوش بالصلصلة و طشة السمنة والفلفل الأسود
وبكدة يبقى طعم الصلصة والطشة موجود لآخر معلقة في طبق الفتة.
وبالهنا والشفا يا هوانم
كتب بواسطة مدون وناقد الطّعام الذواقة محمد صلاح
#الهانم #قصة_تانية_خالص #بهاريز_صلاح
النهاردة الأكلة بتاعتنا بيحبها الصغير قبل الكبير وعلى الرغم من بساطتها بس فيها شوية حركات بسيطة يا تخليها تبقى وهمية و لذيذة جدا زي المطاعم
(ودي طبعا ليها سر وإحنا هنعمله النهاردة)
يا إما تبقي ناشفة وملهاش طعم.
النهاردة يوم الشيش طاووق الشيش طووق لازم حتما ولابد يجي من الوراك !!! ليه لازم من الورك عشان الورك ماليان دهون أكتر من الصدر وأنسجته أخف من الصدر برضه فبالتالي الدهون بتديله طعم أحلى وتسوية أسرع.
فاهنجيب الوراك ونقطعها مكعبات متوسطة الحجم.
إحنا هنعمل تتبيلتين تتبيلة لمدة ساعة وتتبيلة نخلي الفراخ فيها مش أقل من ست ساعت ولحد بالكتير ١٢ ساعة.
١- التتبيلة الأولى نبشر بصلة كبيرة كويس وناخد الميه بتاعتها بس … أنا مش عايز التفل بتاع البصل … تفل البصل لما بيتحط على النار بيشيط ويتحرق الأول والفراخ ما بتكونش إستوت … مية البصل تتصفى الأول كويس وأحط عليها نص كوباية ليمون وفلفل أسود … فقط لاغير و أحط فيها الوراك لمدة ساعة بس كفاية … ليه ساعة؟ عشان البصل وعصير الليمون تقريبا عملوا نوع من أنواع التسوية للفراخ لأن الليمون حامض أو بمعنى أصح أسيد … فهو كدة عمل تسوية جزئية للفراخ.
٢- نطلع ونحط في التتبيلة التانية .. إللي هي عبارة عن: علبتين زبادي ..أربع فصوص توم مهروسين ..
٣ معالق كبار مسطردة ناعمة أو وسط .. معلقة بابريكا حمرا .. فلفل أسود ناعم. وتبات في التلاجة لحد تاني يوم ونطلعها قبل التسوية بساعة عشان تاخد درجة حرارة الغرفة ونحط عليها الملح بتاعنا بعد نص ساعة و نسويها على طول … مش ملاحظين إن إحنا محطناش ملح غير قبل التسوية بنص ساعة بس !!!! عارفين ليه !!؟؟
عشان أغلب الناس بتحط الملح في التتبيلة وتخليها تبات في التلاجة أو تتبل وتتحط في الفريزر فاإللي بيحصل إن الملح يسحب كل السوايل إللي جوه قطعة الفراخ أو الشيش .. و لما تيجي تسوي تاني يوم تلاقي الفراخ ناشفة واتحرقت بسرعة عشان مفيهاش السائل إللي بيديها الطعم أصلا. طيب خلاص تبلنا وظبطنا كل حاجة… هنعمل إيه بعد كدة؟ ممكن نحط خضار نشويه مع الشيش زي البصل القورمة .. فلفل ألوان … مشروم .. زي ما تحبو. نيجي لنقطة الشوي أو التسوية بقي: لو هنشوي على الفحم والسيخ حديد يبقي خير وبركة السيخ كله على بعضه هيستوي بالظبط في ٤ دقايق عشان سخونية السيخ هتسوي قلب الفراخ من جوة كمان
(خدو بالكم الفراخ مش زي اللحمة ممكن تتاكل نص تسوية .. الكلام ده في اللحوم الحمرا بس … اللحوم البيضاء لأ تجيب تسمم علي طول)
لو هنسوي في سيخ خشب على الفحم يبقي لازم يتنقع في الميه بالكامل قبلها بنص ساعة عشان مش أول ما يتحط على النار يتحرق .. وهياخد في حدود ٥ دقايق. و لو هتسوي في سيخ خشب على الطاسة طبعا كل ناحية من الشيش بتاخد دقيقتين تسوية يعني في حدود ٧ دقايق تقريبا للسيخ.
لو هتسوي في الفرن يبقي ممكن يتحط في الأسياخ الخشب المنقوعة في الميه دي لمدة نص ساعة على درجة حرارة ١٨٠ و لو مفيش أسياخ عادي برضه. لو هنسوي على الطاسة من غير سيخ يبقى لازم تكون الطاسة سخنة جدا وفيها شوية زيت خفيف سخن برضه وأحط الشيش فيها وأول ما ياخد لون أقلب الناحية التانية وهكذا لحد ما يستوي.
ليه وقت التسوية معانا قليل كدة … عشان إحنا قولنا دي وراك بتستوي أسرع … وعشان حطيتها في حمض إللي هو الليمون و البصل وده سواها تسوية جزئية فا مش محتاج أدوس عليها في التسوية أووي إلا لو قلبها لسة مستواش.
و اول ما هتطلع من النار هتكون اتشوت وفي نفس الوقت طرية وجميلة ومفيهاش ريحة الحرق … يادوب لون الكراميل الجميل ده … و تقدموها جنب مكرونة أو رز ومعها شوية طحينة بالثوم والبقدونس
و بالهنا والشفا يا هوانم
#الهانم #قصة_تانية_خالص #بهاريز_صلاح
