محشي الزيتون
555 مشـاهدة
منذ سنتين
مخلل الزيتون بيفتح النفس جنب أي أكلة وبيديلها طعم جميل، النهاردة هنحشي الزيتون بالجزر وهنخلي طعمه ضعف الطعامة..
حضــــــــري
١ كيلو زيتون حجم متوسط
١ كوب ملح
١ ملعقة كبيرة عصفر
١ ملعقة كبيرة حبة البركة
١ ملعقة زيت صغيرة
١ كوب عصير ليمون
ليمون قطع
فلفل حار
جزر متقطع صوابع صغيرة
١ ملعقة كبيرة سكر
الـطــريـقـــــة
خـطوة 1
ننقع الزيتون في مياه لمدة ١٥ دقيقة علشان يكون طري شوية ونحتفظ بالمياه دي بيها على جنب وبعدها هنخلي الزيتون من البذر بالمقوار، ونحشيه بصوابع الجزر الصغيرة.
خـطوة 2
نحطه في برطمان كبير ونتبله بالملح والعصفر وحبة البركة والليمون والفلفل وفي الآخر نضيف عليه السكر علشان الجزر يفضل مقرمش وميدبلش بسرعة.
خـطوة 3
نرص الليمون القطع في الأماكن الفاضية في البرطمان ونسقيه بالمياه اللي نقعنا بيها الزيتون في الأول وآخر حاجة نحط على الوش ملعقة زيت صغيرة علشان يحفظه من الهواء.
خـطوة 4
نقفل البرطمان كويس ونحفظه في مكان بعيد عن متناول الأطفال لمدة ٣ أسابيع.
خـطوة 5
قدمي محشي الزيتون واعصري عليه ليمون.
