حضــــــــري
– سمنة الهانم الجديدة خالص
– طماطماية مفرومة
– قشر كابورية (صدف ورجلين)
– نص قشر الجمبري
– بصل أبيض
– جزر
– زعتر
– عود كرفس
– واحده ينسون نجم
– حتة قرفة صغيرة خالص
– عود كرات
الـطــريـقـــــة
خـطوة 1
هنحط كل المكونات مع بعض ومعاهم قشر الكابورية ونص كمية قشر الجمبري في المياه وهنغطيها ونسيبها ۲٥ دقيقة لغاية ما النكهه تظهر وبعدين هنضربها بالهاند بلندر او في الخلاط وبعدين نصفيها.
خـطوة 2
هنكون سايبين نص كمية قشر الجمبري التانية في الفرن على درجة حرارة ٥۰ لمدة ساعتين لحد لما صوته يقرمش خالص وهناخدة ونروح ضربينه في الهون.
خـطوة 3
هنيجي للجمبري هنتبلة بملح وفلفل أسود وطبعا هنحمره بسمنة الهانم بطعم وريحة الزبدة الصفراء ونحط معاه ثوم ونسيبه، يادوب الجمبري ياخد لون بس عشان لسه هينزل في الملوخية.
خـطوة 4
هنيجي للملوخية هنجبها طازة ونخرطها وعشان البهارات مهمة هنحمص الكزبرة والفلفل الأسود كل واحد لوحده الأول عشان كل واحد ليه درجة حرارة مختلفة وبعدين هنحط في الهون ملح و٤ فصوص ثوم ومعاهم الكزبرة والفلفل الأسود اللي حمصناهم ونبدأ نطحن.
خـطوة 5
هنرجع للشوربة تاني هنضيف الملوخية عليها حبة حبة عشان مترقدش في القعر ولازم الشوربة تبقى سخنة بس مش بتغلي ونقلب كويس وهننزل بالجمبري عليهم وبعدين هننقل على العين الصغيرة.
نبدا نعمل التقلية هناخد معلقتين حلوين كده من سمنة الهانم الجديدة خالص وننزلهم فالطاسة ومعاهم التقلية بتاعتنا وبعديها هننزل التكه اللي قولنا عليها في الاول وهيا الجمبري المجفف في الفرن اللي عملناه بودر ونقلبه شويه وننزل بالطشة.
خـطوة 6
وبكده نكون خلصنا وصفة الملوخية بالجمبري الجديدة خالص وهتدوقي طعم روعة خالص، جربوها و قولونا رأيكم في الكومنتات واستنونا في وصفات جديدة خالص مع الهانم الجديدة خالص.
مـواضيـع تـانيـة تهـمـك يـا هـانـم
تلفزيون الهانم
