أول حاجة يا هوانم وأهم حاجة نتخلص من كل الغطاء والعروق اللي على الكبدة وجواها.. علشان الكبدة متكونش بتشد وطبعا كل ما يتشال الغطاء والعروق وهي طازة كل ما يكون احسن هتبقى سهلة و هتستوي تسوية مظبوطة ضروري نشيل اي كتل دموية ونبدأ نقطعها شرايح صغيرة علشان متاخدش وقت في التسوية خالص نقطة مهمة يا هوانم، البهارات لازم تتحمص اول باول يعني مينفعش نحمص كمية كبيرة على الاقل اسبوع باسبوع

"في طاسه على النار هنحمص الفلفل الاسود واول ما نسمع الطقطقه بتاعته نحطه على طول في الهون، الكمون مجرد ما ابتدي اشم ريحته على طول اضيفه للهون، دي هتكون بدايه التتبيلة بتاعتنا -هنضيف معاها ملح لانه بيصنفر الحاجات كلها مع بعض وهنحط معاها 5 فصوص ثوم وملعقة شطة كبيرة وقطعتين فلفل احمر ونطحن كل ده مع بعضه كويس خالص

في طاسة كبيرة وسخنة جدا هنضيف ملعقتين سمنة الهانم المرملة وبعدين ننزل بالكرات المتقطع دواير صغيرة وبعدها ننزل بالكبدة على طول "بحركة سريعة لان الكبدة مش بتاخد وقت في التسوية"

ننزل بعدها على طول بالجنزبيل الفريش المتقطع ونضيف خلطة التوابل الفريش والثوم والفلفل اللي ضربناهم في الهون واول ما الريحة تبقي عالمية تعرفي انك ماشية صح خالص ونبدأ نقلب كويس جدا

نضيف الصويا صوص والفلفل الحامي الاحمر والاخضر والفلفل الرومي اللي متقطع ناعم ورفيع ولو عايزة تضيفي ليمون اختياري في النهاية يا هوانم هنكون عملنا طبق كبدة جديدة خالص هيناسب ذوقكم رغم مكوناته اللي كلها جديدة وطريقته المختلفة اللي تنفع عزومة جميلة لأصحابكم في العيد وبالهنا والشفا يا هوانم وكل سنة وانتم طيبين