اول حاجة لازم نسلق اللحمة في مياه من الحنفية مش ساخنة علشان انسجة اللحمة تفضل زي ما هي وتاخد التسوية المظبوطة لان المياه الساخنة بتشد الانسجه وتخليها تاخد وقت طويل جدا في التسوية. - هنضيف اللحمة ومعاها الكرفس، ورق لورا، جزر وبصل وهنضيف معاها طماطماية ونسبها لحد ما تغلي.

يلا بينا نعمل الصلصة اللي فيها التركة: اول حاجة هنشوي الفلفل على نار البوتاجاز العادية خالص، هنقطع البصل رفيع خالص ونخليها ناعمة خالص.. نحط سمنة الهانم الجديدة خالص في حلة على النار واول ما تسخن ننزل عليها بالبصل الناعم وننزل بالثوم ونقلب، هنلاقي الريحة مش طبيعية مننساش نقلب الفلفل اللي بيتشوح على نار البوتاجاز

هننزل بالجزر المبشور على البصل والثوم ونضيف الطماطم المجففة ونضيف عليها عصير الطماطم المقشورة والصلصة وهنقطع شوية طماطم علشان تبقي صلصة غنية خالص - اخر حاجة في الصلصة هنحط حبيتين قرنفل بالظبط ونقلب كويس ونغطيهم ونسبهم طول الفتره بتاعة تسوية اللحمة - طبعا مش هننسي السر اللي من اسرار الصلصة "الفلفلاية" الرومي اللي بتتشوي هنقشرها ونقطعها ونضفها على الصلصة - هنرجع تاني للحمة اول ما تغلي مينفعش نفضل نخليها تغلي لان بيحصلها حاجة اسمها "تخثر بروتيني" لازم نشيل اللي على الوش علشان ميعكرش الشوربة وبعدين نسيبها على النار تاني من ساعة الا ربع لساعة ونبدأ نبهرها "حبهان، مستكة، فلفل اسود مش مطحون وهنحط 3 دبابيس قرنفل"

دلوقتي هنعمل العيش المحمر: العيش المحمر سر من اسرار الفته هنعمله بسمنة الهانم طبعا علشان يفحفح ويطلع ريحة حلوة ونحط شوية ثوم بودر وبصل بودر في طاسة على النار نسخنها وناخد ملعقة كبيرة سمنة الهانم واول ما السمنة تسيح خالص هنضيف العيش المتقطع مربعات وتركة العيش فصين مستكة واخر حاجة هنحط بصل بودر وثوم بودر اول ما يتحمر هنطلعه في طبق ونسيبة ينشف ويتصفى

اخر حاجه الرز الابيض اللي غرقان زبدة لانه من الاكلات اللي بيفرق معاه طعم الزبدة الصفرا والزبدة الصفرا يعني سمنة الهانم: هنضيف الحلة على النار وهناخد معلقتين سمنة الهانم وهنحط معاها ۳ فصوص حبهان وورق لورا واول ما السمنة تسيح هتاخد نكهة الحبهان واللورا ونضيف عليها على طول الرز ونقلبه تقليبه ونضيف عليه المرقة ساخنة ولازم تسمعي صوت تشة الرز مع المرقة علشان يطلع رز ناجح وننزل بأخر حاجة شوية ملح وفلفل اسود واول ما يتشرب نوطي النار تماما ونغطي ونسيبوا 10 دقائق

نرجع للحمة في طاسة على النار هضيف ملعقة سمنة الهانم ونحمر اللحمة يدوب تاخد لون من النحيتين ونضيف ملح وفلفل عليهم ويبقي احنا كده تمام

اول ما الصلصة تخلص نضربها بالهاند بلندر ونسيبها لحد ما نعمل التكات اللي هي الطشة والنهاردة عندنا طشتين مش طشة واحده في ايد الهون نضيف ٤ فصوص ثوم وفلفل اسود حصى وندقهم مع بعض نبدأ في اساس الفتة، شوية عيش على شوية مرقة على شوية رز ،مش كل الكمية طبعا جزء بسيط منهم يبقي الاساس ونبدأ نرص المكونات بتاعتنا "العيش وعليه الرز ونحط شوية شوربة سخنين على اول طبقة علشان تبقي طرية سنه"

نعمل طشة الخل والثوم، في طاسة هنضيف ملعقة سمنة الهانم كبيرة ونضيف اربع فصوص ثوم شرايح وعليهم فلفل اسود وننزل بالخل اللي هيعمل احلي ريحة ونضيف الطشة على الفتة ونضيف طبعا صلصة التكات اللي فيها كل الحركات - في النهاية نضيف اللحمة المحمرة واخر حاجة الطشة التانية اللي هي عبارة عن "سمنة الهانم مع شوية فلفل اسود وسنة ثوم وهناخد في الطشة سمنة الهانم كتير وناخد معاهم شوية من الثوم والفلفل اللي فرمناهم في ايد الهون وهنضيف فلفل اسود كتير ونضيفها على الطبق الاساسي

في النهاية يا هوانم هنكون عملنا أحلي فتة هتجربوها هتلاقوها جديدة خالص وهتناسب ذوقكم رغم مكوناتها اللي كلها جديدة وطريقتها المختلفة اللي تنفع عزومة جميلة لكل العيلة في العيد وبالهنا والشفا يا هوانم وكل سنة وانتم طيبين