كنافة بالجمبري مع سمنة الهانم الجديدة خالص
228 مشـاهدة
منذ 3 سنوات
متعودين دايما يا هوانم ناكل كنافة بالجمبري في المطاعم، النهاردة هنتعلم نعملها في البيت وبكل سهولة مع سمنة الهانم الجديدة خالص.
الوصفة سهلة اوي المرة دي، تعالو نشوف
حضــــــــري
– جمبري كبير متقشر و متنظف من الظهر وذيله بس الموجود
– شرايط من الكنافة بطول عشرة سم تقريبا
– ٥ معالق سمنة الهانم متسيحة على النار
مكونات التتبيلة:
– نص ملعقة صغيرة ملح
– ملعقة فلفل اسود صغيرة
– ملعقة بابريكا كبيرة
– ربع ملعقة ثوم بودر
– ربع حزمة شبت (ورق فقط من غير سيقان) لكل كيلو جمبري
– حبة ليمون اضاليا لكل كيلو جمبري
الـطــريـقـــــة
خـطوة 1
يتم غسل الجمبري بالماء الجاري و ننشفه كويس بعد كدة.
يتم تتبيل الجمبري قبل اللف بنص ساعة، نحط كل البهارات مع بعض و نعصر الليمون الاضاليا ونفرم ورق الشبت ناعم خالص ونتبل بيه الجمبري، كدة يبقى الجمبري خد نص تسوية عشان الحمض اللي في الليمون.
خـطوة 2
للكنافة:
هنقطع الكنافة على شكل مستطيل بطول عشرة سم وفي فوطة كبيرة نغطيها كويس عشان ما تنشفش وهنسيح ٥ معالق سمنة الهانم على خفيف يدوب تفك، بعد كدة هندهن شرايط الكنافة بسمنة الهانم علشان تطرى و تتشكل معانا كويس ونلف فيها الجمبري على طول زي الفيديو كدة، نبتدي من الراس للذيل
خـطوة 3
وعلشان نقفل الكنافة كويس هنحط ملعقة دقيق كبيرة علي ملعقة مياه صغيرة و نخلطهم كويس وبطرف الصوابع ناخد من العجينة دي نقفل بيها طرف الكنافة اللى في الاخر علشان تلزق كويس وماتفكش في الزيت
خـطوة 4
للقلي :
بعد كدة في زيت جديد متوسط الحرارة هنحط كنافة الجمبري لحد ما تاخد اللون الذهبي الجميل ونطلعها على منديل علشان تمتص بواقي الزيت وتبقى جاهزة للتقديم فورا وهي سخنة مع الصوص بتاعها زي طريقة المطاعم بالظبط.
خـطوة 5
- ملعقة كبيرة مايونيز
- ملعقتين كبار صوص سويت تشيلي
نخلطهم مع بعض و يتم تبريدهم
و بالهنا والشفا يا هوانم
كتب بواسطة ناقد الطعام والمدون محمد صلاح Mohamed Salah El Dine
مـواضيـع تـانيـة تهـمـك يـا هـانـم
تلفزيون الهانم
