الفراخ البانيه مش هنتبلها كتير زي ما بنعمل كل مرة احنا هنتبل بس بملح وفلفل أسود حسب الرغبة، ومعلقة كبيرة بودرة بصل وبودرة ثوم وبابريكا لكل كيلو فراخ بانيه، خلي بالكم صدور الفراخ حاجة وفيليه الفراخ حاجة تانية، فيليه الفراخ دي اللي هي التندر اللي بنشتريها في المحلات للولاد ودي بتكون طرية أكتر بكتير، ومبتاخدش على النار أكتر من دقيقتين أو تلاتة بالكتير، وبتكون في آخر الصدر من تحت وبنلاقيها بارزة لوحدها وبطول الصدر كله، ودي ممكن نجمعها في الفريزر وبعد كده نعملها للولاد وهيتبسطوا بيها اوي، شوفتوا ان احنا محطناش سوائل خالص في تتبيلة الصدور علشان الفراخ مش محتاجة اصلا هي أرق بكتير من اللحمة وبتستوي أسرع، خلي بالكم كمان ان مياه البصل والليمون وبالذات الليمون هيخلي تتبيلة البقسماط تفك من حوالين حتة الفراخ حتى لو جمدنا البانيه، بس لو حصل كده ننشف التتبيلة كويس بمنديل من غير ما يبقى ليها أي آثر.

هنجيب ٣ أطباق طبق فيه دقيق وطبق فيه البيض وعليه رشة فلفل أسود مضروب كويس وطبق فيه البقسماط، طبق البقسماط ممكن يتحط فيه جبنة بارميزان وممكن يتحط فيه ريحان مجفف وزعتر مجفف، وممكن يبقى مشطشط ونحط فيه مجموعة من أنواع الشطة والبهارات الحامية، وممكن رقائق الذرة اللي بيحبها الأطفال بس نتأكد انها مش مسكرة ونكسرها كويس، ودي هتبقى مقرمشة أكتر وهنجيب رشاشة ونملاها مياه وبعد ما هنشيل الفراخ من التتبيلة هنرش رشتين خفاف على كل وش، وبعد كده هيبقى عندنا ايد للسوائل زي البيض وايد للنواشف زي الدقيق والبقسماط بأيد النواشف، هنحط الفراخ الأول في الدقيق وبعد كده ننضفها كويس ونتخلص من كل الدقيق الزيادة، وبعد كده نحطه في البيض ونقلب على الناحيتين وبعد كده بأيد السوائل هنحط في تتبيلة البقسماط ونقلبه كويس بأيد النواشف، نتخلص من البقسماط الزيادة.

في طاسة هنحط شوية زيت قليلين يكونوا في نفس مستوى قطعة البانيه مش أعلى منها، البانيه والبفتيك مش بيتقلوا قلي عميق لكن من على الوش، علشان كده هتلاقوا في كل المطاعم البانيه كله لون واحد مهما كان العدد، على العكس عندنا في البيت أول واحدة لونها حلو وآخر واحدة بتكون لونها غامق، وده بسبب ان الزيت كتير وأكيد مش هنرميه لو لونه اتغير، بعكس القلي اللي على الوش ده هما شوية صغيرين لو لونهم اتغير هنرميهم بسهولة، وأول ما تطلع من على النار ننشف كويس على مناديل ورق ونقدم البانيه سخن، ممكن بقى نجمد الفراخ بالتتبيلة بس يبقى في كيس بلاستيكي فاصل ما بين الدور والتاني وتبقى الفراخ مش لازقة في بعض، وبالهنا والشفا يا هوانم.