اولاً هنتبل العكاوي المتقطعة بملح وفلفل أسود في حلة كبيرة، هنجيب ٣ معالق سمنة الهانم وننزل بيهم لحد ما يسخنوا وننزل بالعكاوي عليهم، هنقلب لحد ما العكاوي تاخد اللون البني المكرمل، بعدين نرفعها وفي نفس الحلة نضيف ٣ بصلات أبيض كبار متقطعين شرائح رفيعة، نقلبهم لمدة دقيقتين وبعد كدة ننزل بجزرتين متقطعين مكعبات صغيرة ومعاهم عودين كرفس فرنساوي عريض، نقلب كويس لحد ما الخضار يبتدي يدبل من غير ما ياخد لون.

نرجع العكاوي تاني في نفس الحلة، ونحط كوباية مرقة او حتى مياه مغلية مع خمس ورقات لورا ودبوسين قرنفل وحتتين مستكة وقرن فلفل ارناؤطي أحمر، هتلاقوا نوع الفلفل ده عند العطارين السوريين، نضيف ٢ طماطم متقطعين من غير قشر ونقفل عليهم ونحطهم على أصغر عين بوتاجاز لمدة ساعتين ونص.

قبل العكاوي ما تخلص بربع ساعة هنشوح ٢٠٠ جرام لسان عصفور في ٢ معلقة من سمنة الهانم، لحد ما ياخد اللون البني الفاتح وبعد كده نضيفه في نفس حلة العكاوي مع ٥ فصوص ثوم مضروب مع معلقة صغيرة من الكبابة الصيني، نقلبهم كويس ونتأكد من وجود سائل جوه الحلة، ولو مفيش نزود كوباية كبيرة مرقة أو مياه علشان لسان العصفور يتشربهم كويس.

هنحط كل المكونات دي في طاجن كبير وندخله الفرن علي درجة حرارة ٢٠٠ مئوية لمدة نص ساعة، وساعتها بجد هتدعولي يا هوانم وكل سنة وانتم طيبين.