طبق اللحم - El Hanim
طبق اللحم

طبق اللحم

اعجــاب
750 مشـاهدة
منذ سنتين

هنتكلم النهاردة يا هوانم عن أهم طبق على السفرة المصرية، سيد الطعام بمعنى أصح “طبق اللحم”.

طبق اللحمة على السفرة المصرية شيئ مقدس, بتحتفل به الأسرة كلها وياسلام لو اللحمة كانت جوه طاجن بامية أو مزينة طبق فتة بالخل والثوم, الفرحة تكبر أكتر لو قطعنا اللحمة حتت وغطسناها في طاجن بصل متبل

 وتبقى مشكلة لو وقعنا في إيد تاجر غير شريف ومهتمش بالعجول والخرفان وسابها تاكل من أكوام الورق والمخلفات وأهملها فى الرعاية والغذاء النضيف, إحنا مبنقولش إننا نسَمّع الحيوانات موسيقى زي ما نيوزلاند بتعمل، إحنا بس بنطلب الرعاية والرقابة على تغذية الحيوانات دي علشان مفيش أبشع من إننا ناكل لحم إتغذى على أكوام المخلفات وقطن المراتب وورق المكاتب.
ولو لاقدر الله حصل وإشترينا النوع إللي مش ولابُد ده من اللحم، هاقولك على طُرق مبتكرة لطبخها نقدر من خلالها ننقذ ما يمكن إنقاذه منها …

الشوي من الحلول الفعالة، سواء في الفرن أو على الشواية, يفضل وقتها استخدام ثمرة كيوى أو بابايا (باباظ) تضرب في الخلاط ونزود ماية البصل وطماطم وتوابل بحيث إن الكيوي يعمل تنعيم للأنسجة الشديدة للحمة وخصوصا لو كانت اللحمة خالية من الدهون أو العروق

 طريقة تانية هي استخدام الماية الفوارة  (parkling water) تتبل بيها اللحمة مع الطماطم والبصل وطبعا الملح والفلفل . ولو الهانم حابة تسلق اللحمة عشان تستفيد من المرقة, هنا بقى نقع في غلطة منتشرة جداً هي تسوية اللحمة بشدة في مرحلة السلق لدرجة الغلي, فالسلق Simmering)) يعني التسوية على نار هادية, يفضل هنا تتبيل اللحمة بالملح والفلفل قبل ما نبدأ طبخ على الاقل ب 45 دقيقة وتتحط برة التلاجة لحد ما توصل لدرجة حرارة الغرفة بعد كدة تتشوح فى سمنة الهانم لحد ما يتغير لونها, لأن اللون لما يتغير معناه طعم أحلى للحمة, بعد كدة نحط اللحمة المتشوحة في المايه المغلية على النار وتكون المايه مضاف لها ورق الغار (لاورا) ومستكة وحبهان وأعواد قرنفل وبعد ما نحط اللحمة في المايه وتظهر فقاعات الغليان وطي النار و تفضل متغطية لحد ما تستوتي كويس.
آخر ملحوظة … كلوا مع إللى بتحبوهم، الأكل هيبقى دايماً أحلى.
كتب بواسطة مدون وناقد الطّعام محمد صلاح
#بهاريز_صلاح

#الهانم #قصة_تانية_خالص

مـواضيـع تـانيـة تهـمـك يـا هـانـم


اشترك فى القائمة البريدية ليصــلك أخــر الاضـافــات وأخــر الوصفـــات

اترك تعليقاً

تعليق واحد