هنقطع ٤ بصل أبيض كبار شرائح رفيعة، ونحط عليهم نص معلقة صغيرة ملح ومعلقة كبيرة فلفل أسود، ندعك البصل كويس بايدينا في نفس الصينية اللي هنعمل فيها البطاطس، بعد كده هنقطع فرخة كاملة على ٨ قطع ونحطهم في الصينية، ونقلبهم كويس في البصل ومعاهم معلقتين كبار سمنة الهانم ومعلقة بابريكا حلوة كبيرة مع ٤ فصوص ثوم مفرومين ولو متاح حبهان يبقى فص واحد بس.

هنغطي الفرخة في الصينية بورقة فويل ونحطها على البوتاجاز من فوق لمدة نص ساعة، الفرخة علشان متقطعة كويس مش هتاخد وقت في التسوية، في الوقت ده نكون قطعنا ٤ حبات بطاطس كبار شرائح متوسطة مش رفيعة علشان ماتتهريش، هنسخن الفرن بتاعنا على درجة حرارة ١٨٠، ونفتح على الفراخ ونحط معاها البطاطس المتقطعة وعود كرفس متقطع رفيع وقرن فلفل حار بالكامل حسب الرغبة، نضيف معلقتين كمان من سمنة الهانم مع كوباية كبيرة مياه سخنة أو مرقة فراخ حسب المتاح عندنا في الوقت ده.

ممكن نزين وشها بفلفل رومي أخضر مع شرائح طماطم علشان تديلنا شكل وطعم للصينية، بعد كده ندخلها الفرن لمدة نص ساعة أو ساعة إلا ربع بالكتير وهتطلع وشها محمر وحلو أوي، هتلاقي الفراخ مستوية ومهرية كمان والبابريكا وسمنة الهانم بيخلوا طعمها مظبوط على الشعرة.