هنخلل السردين في اربعة وعشرين ساعة بس، ايوه قريتوا صح اربعة وعشرين ساعة بالظبط وهتاكلوا سردين مملح، كل المطلوب من حضراتكم ٢ كيلو سردين طازة، لازم يبقي طازة مش مجمد علشان تنظيفه وتقطيعه، السمك السردين المحمِر ده مش طازة، كمان كيلو إلا ربع ملح ناعم واحنا بنشتري السردين، وهنطلب من السماك الآتي: السمكة تبقي من غير قشر ويشيل الراس والبطن بالكامل إلا لو فيها بطارخ يشيل شوك البطن من الجانبين وسلسلة الظهر تتشال من غير ما يقسم السمكة نصين ودي خطوة سهلة علشان السلسلة طرية، هيتفضل كده عندنا السمكة كاملة بالذيل بتاعها مفتوحة بالكامل، من غير ما تتفصل نصين ومن غير السلسلة وشوك البطن والراس وخلوا السماك يرص السمك ده في أطباق فوم جنب بعض ومايحطهمش في كيس علي بعض وخلاص.

بسرعة نروح نحط السمك في تلج من غير مياه لمدة نص ساعة، التلج هيخلي السمك يمسك نفسه كويس أوي، بعد كده هنجيب صينية عريضة ونرص كيلو سردين دور دور، يعني أول طبقة من السردين راس وذيل وراس وذيل جنب بعض، وهنغطيها بكمية ملح كويسة، لو عايزين تضيفوا شوية شطة حسب الرغبة يا سلام تبقي عظمة، تاني دور هنحط السردين ونغطيه بالملح برضه، ونعمل كده لحد ما نخلص الكيلو كامل في الصينية التانية.

نعيد نفس الترتيب ونغطي الاتنين بالاسترتش أو أي كيس، وندخلهم التلاجة جنب بعض لمدة اربعة وعشرين ساعة بالظبط، تاني يوم هنجيب بولة كبيرة مليانة مياه وثلج ونغطس السمك فيها سمكة سمكة لحد ما كل الملح اللي عليها ما ينزل تماماً، ونطلعها على منديل أو فوطة مخصصة للسمك وننشف كويس بحذر تتبيلة السمك.

كده السمك بالفعل اتملح تعالوا بقي نعمله تتبيلة وهمية، هنعصر ٢ ليمون اضاليا ونبشر قشرة ليمونة منهم من غير ما نوصل للقشرة البيضاء، ناخد عصير الليمون ونحط بشر الليمون عليه ونضيف عليه نص كوباية زيت زيتون، ومعاه ربع حزمة شبت ورق بس مش سيقان متقطع ناعم، ونحطهم في علبة بلاستيك ونرجعهم كويس أوي لحد ما يتقلوا، نحط السمك في طبق تقديم ونحط عليه التتبيلة دي، وبكده نبقي عملنا سردين شم النسيم بكل صحة وأمان وبالهنا والشفا عليكم يا هوانم.

ملحوظة: ممكن نملح السردين لمدة يومين أو ثلاثة بأقصي قدر ومش أكتر من ثلاثة أيام علشان ماينشفش أو يملح جامد.